Leita á in.fo

Tróndur Arge 14.09.2018 (10:13)

Heimir heldur fram í HB

Havnar Bóltfelag og íslendski venjarin, Heimir Guðjónsson, hava gjørt avtalu um at halda fram við samstarvinum í 2019. Tað boðar heimasíðan hjá felagnum frá í dag.

 

- Heimir Guðjónsson hevur gjørt eitt megnar arbeiði fyri HB hetta kappingarárið, og tí eru vit sera fegin um at leingja samstarvið. Saman við Heimi fara vit sum felag at byggja víðari á alt tað, sum higartil er gjørt, sigur Kaj Leo Holm Johannesen, formaður í HB.

 

Heimir Guðjónsson skifti undan hesum kappingarárinum frá íslendska FH til HB. Hann hevur fingið HB upp í oddin aftur í føroyskum fótbólti, og hann leggur nógv fyri til venjing.

 

- Heimir Guðjónsson er sera nærlagdur, hann krevur nógv av øllum spælarum, og hann hevur samstundis megnað at fingið ein sterkan hugburð í hópin, har hvør maður leggur nógv fyri til tess at røkka felags mál, skrivar heimasíðan hjá HB og leggur afturat:

 

- Tá ið HB og Heimir gjørdu avtalu fyri hetta árið, var tað við einari ætlan um at halda fram við samstarvinum komandi ár, og tann avtalan er nú formliga fingin upp á pláss. Tað eru leikarar, felagslimir og viðhaldsfólk sera takksom fyri, tí nú kann arbeiðið, sum byrjaði við Heimi, halda fram.

 

Heimir Guðjónsson er 49 ára gamal og hevur sjálvur spælt á hægsta stigi í Íslandi, har hann eisini er høgt í metum sum venjari. Sum leikari spældi hann við KR frá 1986, eitt skifti leikti hann við ÍA fyri síðan at spæla við FH til 2006. Sum venjari eydnaðist Heimi Guðjónsson at gerast meistari fimm ár á rað við FH, áðrenn hann kom til HB.


Veitst tú eina góða søgu? Skriva til okkara á red(at)in.fo
Les ella lýs í Lýsingartorginum – trýst her