Ein partur av triðja umfari í Liga Cup kappingini, sum er tann minna av tveimum steypakappingum í enskum fótbólti, hevur verið í dag. Størsti skelkurin kom á Old Trafford, har Manchester United tapti fyri Derby County, sum spælir í næstbestu deildini.
Juan Mata legði annars Manchester United á odda longu eftir tríggjar minuttir. Í seinna hálvleiki broyttist alt. Fyrst javnaði Harry Wilson við framúr frísparki, áðrenn Sergio Romero í málinum hjá Manchester United fekk beinleiðis reytt kort, tá hann brúki hondina uttanfyri brotsteigin.
Stutt fyri tíð skoraði Derby aftur, men langt inni í yvirtíðini javnaði tann so oftani útskeldaði Marouane Fellaini. Tað endaði við brotssparkskapping, har Derby vann 8-7, eftir at Phil Jones brendi. Í mun til undanfarnu árini, so verður farið beint til brotssparkskapping, tá ein dystur endar við javnleiki.
Venjari hjá Derby er Frank Lampard, sum í síni tíð spældi undir leiðslu av José Mourinho, sum í dag er venjari hjá Manchester United.
3. umfar í Liga Cup:
AFC Bournemouth 3 - 2 Blackburn Rovers
Blackpool 2 - 0 Queens Park Rangers
Burton Albion 2 - 1 Burnley
Millwall 1 - 3 Fulham
Oxford United 0 - 3 Manchester City
Preston North End 2 - 2 Middlesbrough *
Wolverhampton Wanderers 0 - 0 Leicester City *
Wycombe Wanderers 3 - 4 Norwich City
Manchester United 2 - 2 Derby County *
West Bromwich Albion 0 - 3 Crystal Palace
*Víðari eftir brotssparkskapping