Leita á in.fo

Tróndur Arge 12.03.2019 (21:48)

Ronaldo gjørdi tað ótrúliga

Juventus og Manchester City hava í kvøld spælt seg víðari til fjórðingsfinalurnar í Champions League. Manchester City vann væntað á Schalke 04, meðan Juventus vann ein ótrúligan 3-0 sigur á Atletico Madrid.

 

Les eisini: Nú má Ronaldo bjarga Juventus

 

Juventus var aftanfyri 2-0 frá fyrra dystinum og tí vóru oddsini ímóti Cristiano Ronaldo og hansara monnum. Men sum ikki eina ferð, so vísti Cristiano Ronaldo klassan í Champions League, sum hann hevur vunnið fimm ferðir.

 

Fyri hálvleik setti pannuna á eitt innlegg og skoraði. Talan var um góða renning við handari stong, har portugisin vísti dirvi, at leypa upp við fullari ferð og stinga høvdið fram. Í seinna hálvleiki setti hann aftur høvdið á eitt innlegg, men hesa ferð var ikki eins nógv ferð á bóltinum. Dómarin kundi tó avlesa við máltøkni, at bólturin var innanfyri.

 

Nú stóð á jøvnum, men á heimavølli hevði Juventus munin í spæli. Tað endaði við at Federico Bernardeschi bleiv rendur umkoll í brotssteiginum. Cristiano Ronaldo legði bóltin á blettin og smekkaði hann í málið til 3-0, sum eisini bleiv úrslitið.

 

Í hinum dystinum var Manchester City longu á odda 3-2 frá fyrra dystinum, men var nakar ivi, so vardi ikki leingi til hann var vekk. Manchester City vann heili 7-0! Í hálvleikinum var 3-0, eftir tvey mál frá Sergio Aguero og frá Leroy Sane. Í seinna hálvleiki skoraðu Raheem Sterling, Bernardo Silva, Phil Foden og Gabriel Jesus.

 

Manchester City og Juventus er komin í fjórðingsfinaluna saman við Ajax, Tottenham, Manchester United og FC Porto. Í annaðkvøld spæla Bayern Munchen og Liverpool, umframt FC Barcelona og Lyon. Báðir teir fyrru dystirnir endaðu við málleysum javnleiki.

 

Champions League 1/8:

Juventus – Atletico Madrid 3-0 (1-0)

1-0 Cristiano Ronaldo, 27

2-0 Cristiano Ronaldo, 48

3-0 Cristiano Ronaldo, 86

Juventus vinnur samanlagt 3-2

 

Manchester City – Schalke 04 7-0 (3-0)

1-0 Sergio Aguero, 35 br

2-0 Sergio Aguero, 38

3-0 Raheem Sterling, 42

4-0 Leroy Sane, 48

5-0 Bernardo Silva, 71

6-0 Phil Foden, 78

7-0 Gabriel Jesus, 84

Manchester City vinnur samanlagt 10-2


Veitst tú eina góða søgu? Skriva til okkara á red(at)in.fo
Les ella lýs í Lýsingartorginum – trýst her