Leita á in.fo

Mynd frá Kringvarpinum

André Olsen 12.01.2018 (16:53)

Taptu aftur við átta málum

Føroyska hondbóltslandsliðið er í hesum døgum í Italia til HM-undankapping, har Føroyar spæla landsdystir móti Ukreina, Rumenia og Italia. Í dag spæla Føroyar annan dystin í undankappingini, tá Føroyar møta Rumenia.

 

Í gjár spældu Føroyar móti Ukreina í einum dysti sum Ukreina vann 30-22, eftir hálvleiksstøðuna 17-13.

 

Tróndur Arge er í Italia og sigur frá, og til ber at hoyra hansara frásøgn beinleiðis á www.midlar.fo. Eisini vísir Kringvarpið dystin beinleiðis í sjónvarpinum, og til ber at stroyma harfrá við at trýsta á her.

 

 

Føroyar – Rumenia 20-28 (10-15)

 

Liðugt 60 min: 28-20 til Rumeina – So er annar dysturin liðugur hjá Føroyum til HM-undankappingina í Italia, og júst sum til dystin í gjár,  taptu Føroyar í dag við átta málum. Endaliga úrslitið av dystinum var 28-20 til Rumenia eftir hálvleiksstøðuna 15-10 til Rumenia. Sum heild var innsatsurin á føroyska liðnum góður gjøgnum allan dystin, men ein afturvendandi trupulleiki í dystinum var, at føroysku leikararnir brendu alt ov illa upplagdar málmøguleikar. Í morgin spæla Føroyar seinasta dystin í HM-undankappingina. Tá spæla Føroyar móti vertstjóðini, Italia.

 

50 min: 23-15 til Rumenia – Rumenar fáa sum væntað ein sigur til dystin í kvøld, og spurningurin er bert, hvussu stórur hann verður. Føroysku leikararnir brenna ov illa upplagdar málmøguleikar.

 

40 min: 19-13 til Rumenia – Tað er mestsum sami munurin millum Føroyar og Rumenia sum í áðni, og tað tykist eingin ivi vera um, at favorittarnir úr Rumenia fara at strúka avstað við sigrinum. Føroyska liðið tykist eitt sindur fjálturstungið í álopsstøðu, har álopini ofta verða skundað ígjøgnum.

 

Hálvleikur 30 min: 15-10 til Rumenia – Seinastu tíggju minuttirnar hevur gingið verri hjá føroyska liðnum. Føroyar náddi í áðni at koma uppa 10-9, áðrenn stígur kom í føroyska liðið. Rumenia hevur drigið frá, og er nú á odda við fimm málum, har okkara menn hava misnýtt nógvar stórar møguleikar.

 

20 min: 10-8 til Rumenia – Hóast Rumenia verður mettur sum stórfavorittur undan dystinum, hevur tað gingið rímiliga væl hjá føroyska liðnum fyrstu 20 minuttirnar. Enn er munurin bara tvey mál.


Veitst tú eina góða søgu? Skriva til okkara á red(at)in.fo
Les ella lýs í Lýsingartorginum – trýst her