Føroyska operan, Í Óðamansgarði, sum er bygd á stuttsøgu eftir William Heinesen, skal seinni í mánaðinum setast upp í Tjóðleikhúsinum í Reykjavík Ria Tórgarð, Hans Tórgarð og Gunnvá Zachariasen gera í løtuni klárt at fara til Íslands. Saman við íslendskum tónleikarum, sangarum og dansarum, skulu tey standa fyri tveimum sýningunum av Í Óðamansgarði í Tjóðleikhúsinum í Reykjavík í døgunum 22. og 23. mai.
Í Óðamansgarði er opera bygd á stuttsøgu eftir William Heinesen, og varð hon fyri fyrstu ferð sett upp í Norðurlandahúsinum í oktober 2006. Tær seks sýningarnar eydnaðust væl, og fekk operan góð ummæli úti í heimi. Nú er avtala fingin í lag um at operan skal setast upp í Tjóðleikhúsinum í Reykjavík.
Sunnleif Rasmussen hevur gjørt tónleikin til operuna, og Elisa Heinesen hevur gjørt pallmyndina. Tey vera bæði til staðar, tá operan verður sýnd í Tjóðleikhúsinum.
Gunnvá Zachariasen og Hans Tórgarð spæla teir báðar høvuðsleiklutirnar, meðan sangarar og tónleikarar vera íslendingar. Operan verður framførd á føroyskum, men íslendskur tekstur verður gjørdur til sýningarnar.
