Leita á in.fo

Hallur av Rana 09.02.2019 (20:13)

Ann kann vinna ársins eldsál hjá P2

Føroyska Ann Andreasen, sum er leiðari á barnaheiminum í Uummannaq í Grønlandi, er tilnevnd heiðurin sum ársins eldsál hjá donsku útvarpsstøðini P2 hjá DR. Tað skrivar dr.dk.


Árligi heiðurin verður latin persónum, ið á ein hvønn hátt hava givið eitt íkast til at endurnýggja klassiska tónleikalívið í Danmark, og er Ann Andreasen tilnevnd av lurtarunum hjá P2 fyri at brúka klassiskan tónleik í sínum arbeiði í barnaheiminum.


- Sosialu førleikarnir hjá børnunum betrast gjøgnum samspæl við onnur, og harvið læra tey eisini seg sjálvi betri at kenna, skriva Jonna Færø, musikkpedagogur, og Conni Gregersen, sálarfrøðingur, í grundgevingini til tilnevningina.


Umframt Ann Andreasen eru Janne Thomsen, orkesturleiðari, og Anne-Kari Ferenci, kórleiðari, tilnevnd heiðurin. 


Vinnarin verður kunngjørdur 14. februar, tá P2 heiðurskonsertin verður hildin í Musikkens Hus í Aalborg.


Tað eru lurtararnir hjá P2, ið eru komin við uppskotum. Síðan hevur ein nevnd við trimum fakfólkum valt tey trý burturúr rúgvuni av tilnevningum og velur sama nevnd vinnaran. 


Veitst tú eina góða søgu? Skriva til okkara á red(at)in.fo
Les ella lýs í Lýsingartorginum – trýst her