Avstralskir myndugleikar hava driðið tveir stórar hávar, eftir at ein kvinna og ein genta fyrr í vikuni vórðu álopnar við oyggjarbólkin Whitsundays nærindis Great Barrier Reef.
Talan var um tvey ymisk álop, og báðar eru framvegis á sjúkrahúsi.
Ein 12 ára gomul genta úr New Zealandi, sum var og ferðiast saman við pápa og systir, varð hósdagin álopin í Cid Harbour og bitin í beinið.
Dagin fyri var ein 46 ára gomul kvinna úr Tasmania álopin í sama øki á einum snorklatúri og bitin í lærið.
Eftir álopini fóru avstralskir fiskimenn at jakstra tann ella teir hávarnar, sum høvdu fram álopið.
Fiskimenn við havnarøkið kring Whitsundays settu línur við stórum húkum við agni.
Í dag upplýsir talsmaður fyri fiskarivinnuna í Queensland, at myndugleikarnir hava fangað tveir stórar tikarahávar. Annar av teimum er 3,3 metrar langur.
– So stórir hávar kunnu vera ógvuliga vandamiklir fyri fólk, men vit kunnu ikki vita við vissu, um tað vóru hesir hávarnir, ið lupu á kvinnuna og gentuna, sigur talsmaðurin.
Hann leggur afturat, at línurnar við agninum fara at standa í eina viku afturat fyri at minka um vandan hjá fólki í sjónum.
Whitsundays er eitt vældámt ferðamál bæði fyri avstralsk og útlendsk ferðafólk. Ikki minst tí at oyggjabólkurin liggur nærindis heimsins størsta koralriv, Great Barrier Reef.
Hávaálop eru sjáldsom í Whitsundays. Tað eru átta ár síðani, at tað seinast var eitt álvarsamt hávaálop í økinum.
/ritzau/AFP