Bátafelagið á Bakka skipar fyri kappsigling á Skálafirði sunnudagin klokkan 15
Eftir at steðgur var komin í siglingina, sum Lions Club Eysturoy og seinri Seglið skipaðu fyri gjøgnum mong ár, tók Bátafelagið á Bakka siglingina uppaftur á Eystanstevnu í fjør og er ætlanin, at hetta verður eitt afturvendandi tiltak á Eystanstevnu.
– Við hesum tiltaki vil Bátafelagið á Bakka verða við til at varðveita og menna áhugan fyri sigling við seglum við føroyska bátinum, sigur Bátafelagið á Bakka í tíðindaskrivi.
Aftan á siglingina bjóðar Bátafelagið kaffi og pannukøkur í felagshúsunum, har steypahandan eisini verður. Bátur nr 1, 2 og 3 fáa steyp.
Um siglingina
Siglingarleið:
Siglt verður á Skálafjørðinum, og siglingarleiðin verður eftir sum ættin er, og málið verður við Bátahylin á Bakka.
Reglur fyri siglingina:
A. Báturin
Luttakandi bátar kunnu verða 4 og 5 mannafør úr træi ella glastrevju.
B. Seglið
Seglið skal ikki vera størri enn 6 ½ m2.
C. Útgerðin
Sambært galdandi lóggávu.
D. Tað er undir siglingini ikki loyvt at nýta
1. Leysastýri
2. Seglrigging uttanstokka
3. Árar.