Nú Heðin Mortensen er vorðin landsstýrismaður, má hann samstundis leggja frá sær bæði tingsess og býráðssess í Tórshavnar býráð.
Í hansara stað í Løgtinginum er Djóni Nolsøe Joensen longu komin. Hann misti fasta sæti, sum hann hevði fyri Henrik Old 1. oktober.
Næst á listanum hjá Javnaðarflokkinum til býráðsvalið í Havn er Bjørg Dam, sum tí nú fær fast sæti, so leingi Heðin Mortensen er í farloyvi. Og av tí at hann biðjur um farloyvi í longri enn tríggjar mánaðaðir, so tekur hon eisini við nevndarsessunum, sum Heðin Mortensen hevur. Eitt nú er hann limur í fíggjarnevndini, sum er politiskt sterkasta nevndin í Tórshavnar býráð.
Javnaðarflokkurin hevur fimm fólk í Tórshavnar býráð. Tey eru:
1 | Heðin Mortensen | 2.506 |
2 | Tróndur Sigurðsson | 676 |
3 | Bjørghild Djurhuus | 218 |
4 | Helena Dam á Neystabø | 145 |
5 | Halla Samuelsen | 143 |
Næst á listanum eru:
6 | Bjørg Dam | 137 |
7 | Odd Færø | 136 |
Bert ein atkvøða var á muni millum Bjørg Dam og Odd Færø. Og tað merkir, at Bjørg Dam nú fær fasta sessin hjá Heðini Mortensen í Tórshavnar býráð, meðan Odd Færø verður 1. varalimur og tí helst fer at møta í býráðnum av og á.
Løgtingsval verður áðrenn næsta býráðsval, sum verður í november í 2020. Um Heðin Mortensen ikki heldur fram í landsstýrinum, so tekur hann uttan iva við býráðssessinum aftur. Løgtingsval verður í seinasta lagi 30. august næsta ár.
