– Tað er satt at siga nakað tvætl, at samgongan fær fría mikrofon í Kringvarpinum.
Tað sigur Heini Gaard, settur tíðindaleiðari í Kringvarpinum, í viðmerking til tað, sum Bjarni Djurholm, fyrrverandi løgtings- og landsstýrismaður segði í hvassari viðmerking til Kringvarpið í gjár.
Les eisini: http://www.in.fo/news-detail/kvf-hevdi-serliga-deild-at-fella-landsstyrid/KVF hevði serliga deild at fella landsstýrið
– Hatta má standa fyri hansara rokning. Mær vitandi hevur ongantíð verið nøkur task force deild sett í Kringvarpinum. Hvørki í mínari tíð sum tíðindaleiðari ella frammanundan, sigur Heini Gaard.
– Hasum kann eg blankt afturvísa, sigur hann.
– Tað er eingin fjald politisk dagsskrá í Kringvarpinum. Punktum. Og eg síggi heldur ikki nakran trupulleika í tí, at tveir politikarar úr samgonguni eru í einum politiskum kjaki í sjónvarpinum, um ein ósemja er um eitthvørt í samgonguni. Viðhvørt eru ósemjur í samgonguni, og viðhvørt eru ósemjur millum samgongu og andstøðu. Og so verður kjakið og luttakararnir í kjakinum hareftir, sigur Heini Gaard.
Hann vísir á, at andstøðan óteljandi ferðir hevur verið við í slíkum kjaki. Hon er á ongan hátt útihýst úr Kringvarpinum.
– Tað skal bara ein pinkalítil leiting til, so finnur eisini Bjarni Djurholm út av tí, sigur Heini Gaard.
Bjarni Djurholm er ein av royndastu politikarum í Føroyum. Hann hevur verið landspolitikari í eina fjórðingsøld, harav næstan átta ár sum landsstýrismaður í vinnumálum. Men hvat heldur tíðindaleiðarin í Kringvarpinum um ein so hvassa viðmerking frá einum slíkum persóni?
– Bjarni Djurholm er sera atfinningarsamur. Tað er hann ofta, og hann hevur ofta skrivað viðmerkingar, har hann altíð finst at Kringvaprinum. Tað sum hann helst í veruleikanum er ónøgdur við, er at tað er ein samgonga, sum hann ikki er samdur við.
– Men Bjarni Djurholm er eisini fastur partur í einum paneli í Kringvarpinum, har fyrrverandi politikarar gera sínar viðmerkingar til dagsins politikk. Hann hevur eisini verið nógv í Kringvarpinum sum landsstýrismaður og fleiri ferðir síðani tá.
– Men tað er gott, at fólk hava meiningar um tingini, og at tey siga sína meining, sigur Heini Gaard. Tað er bara gott, heldur hann.
