Leita á in.fo

Jóannes Hansen 18.06.2017 (17:15)

Favorittarnir flongdir og skrædlaðir

Inntil í dag høvdu Víkingur og KÍ ikki tapt. Eftir trettanda umfar sigur talvan, at bæði Víkingur og KÍ hava tapt.

Næstsíðsta umfar undan summarsteðginum var merkisvert á tann hátt, at talan var um fýra útisigrar og bara ein sigur á heimavølli - Suðringar í Trongisvági.

 

Størsta skrædlið var í Klaksvík. Higartil í ár hevur tað ikki gingið væl hjá B36. Í dag var einki at rafla um. B36 smurdi KÍ av 5-1! Tí ber ikki til at siga annað, enn at fyrsta KÍ tapið var øgiligt. B36 hevur aftur og aftur mist. Nú glapp og tað av álvara.

 

Víkingur legði seg tíðliga í fyrra hálvleiki framum ímóti NSÍ, og Adeshina Lawal hevði møguleika at økja um leiðsluna, men hann misnýtti brotsspark, sum Símun Rógvi Hansen í NSÍ málinum bjargaði.

Eftir steðgin var tað Klæmint A. Olsen, sum við stútara javnaði. Síðstu løtuna var heimaliðið undirmannað, eftir at Andreas Lava Olsen tvær ferðir hevði sæð gult og harvið eisini reytt. Í yvirtíðini var tað Árni Frederiksberg, sum skoraði sigursmálið og lyfti NSÍ heilt fram í toppin. Tað eru bara tvey stig fram til Víking og KÍ.

 

Búi Egilsson er í hopla á liðnum hjá Suðringum. Eftir at Tór-Ingar Akselsen hevði lagt 07 Vestur framum í Trongisvági, tiltuskaði Búi Egilsson heimaliðnum brotssparkið, sum Jón Krosslá Poulsen javnaði við. Eftir steðgin og við lotinum undan skoraði Búi Egilsson tvær ferðir, og harvið eru Suðringar á tryggum fjórða plássi.

07 Vestur er eftir tapið í Trongisvági aftur undir strikuni.

 

B36 sigurin í Klaksvík var ógvuliga søtur. Fimm ymiskir málskjúttar og trý stig, sum bera við sær, at árstalsfelagið aftur er frammanfyri HB, sum tapti 2-1 á heimavølli ímóti Skála.

HB legði seg framum, og HB hevði fleiri møguleikar at økja um leiðsluna, sum Sebastian Pingel syrgdi fyri. Brian Jacobsen javnaði við fyrstu Skála royndini í fyrra hálvleiki, og fram ímóti dystarenda skoraði innskifti Jákupi Johansen sigursmálið. Tað ber við sær, at Skála nú er omanfyri strikuna.

 

Nú sær tað heilt svart út í Fuglafirði. EB/Streymur vann 3-1 í Fløtugerði. Sigurin ber við sær, at EB/Streymur er trý stig omanfyri strikuna. ÍF er nú seks stig frá bjargingini. Veteranurin Leif Niclasen setti hol á, og eftir at Bogi Reinert Petersen hevði javnað við stútara eftir horna, var tað innskifti Niklas Kruse, sum skoraði fyrsta málið nakrantíð í bestu deildini.

 

KÍ-B36 1-5 (0-3)

0-1: Odmar Færø

0-2: Lukasz Cieslewicz

0-3: Benjamin Heinesen

0-4: Erlendur Magnusson

1-4: Albert Adu

1-5: Hannes Agnarsson

 

ÍF-EB/Streymur 1-2 (0-1)

0-1: Leif Niclasen

1-1: Bogi Reinert Petersen

1-2: Niklas Kruse

 

Víkingur-NSÍ 1-2 (1-0)

1-0: Adeshina Lawal

1-1: Klæmint A. Olsen

1-2: Árni Frederiksberg

 

HB-Skála 1-2 (1-1)

1-0: Sebastian Pingel

1-1: Brian Jacobsen

1-2: Jákup Johansen

 

Suðringar-07 Vestur 2-1 (1-1)

0-1: Tór-Ingar Akselsen

1-1: Jón Krosslá Poulsen br

2-1: Búi Egilsson

3-1: Búi Egilsson

 

 

Støðan

Víkingur 26 stig

KÍ 26 stig

NSÍ 24 stig

Suðringar 19 stig

B36 17 stig

HB 17 stig

EB/Streymur 14 stig

Skála 13 stig

07 Vestur 11 stig

ÍF 6 stig

 

Fjúrtanda umfar

Fríggjadagin 23. juni

 

ÍF-KÍ

Skála-NSÍ

Suðringar-HB

07 Vestur-Víkingur

EB/Streymur-B36


Veitst tú eina góða søgu? Skriva til okkara á red(at)in.fo
Les ella lýs í Lýsingartorginum – trýst her