Lønardeildin hjá Fíggjarmálaráðnum og sjúkrarøktarfrøðingarnir eru rúkandi ósamd um, hvør av pørtunum er sinnaður at samráðast, og báðir partar hava í dag sent út tíðindaskriv.
– Tað eru ikki samráðingar, tá Fíggjarmálaráðið hevur avgjørt frammanundan, hvat lønin skal verða, og noktar at flyta seg ein tumma. Hetta er brot á fría samráðingarrættin.
Tað skriva Felagið Føroyskir Sjúkrarøktarfrøðingar í tíðindaskrivi í kvøld, og felagði heldur fram:
»Einki fakfelag kann góðtaka, at Fíggjarmálarráðið ikki virðir hendan rættin.
Fíggjarmálaráðið tykist sera áhugað í at samráðast í miðlunum og borðreiðir við tølum av alskyns slag. Hendan fløkja av tølum tykist mest ætlað at skula taka fokus frá veruligu støðuni. At Fíggjarmálaráðið ikki virðir rættin hjá fakbólkum at samráðast hvør sær.
Okkara limir fáa nógv minnið í løn enn aðrir starvsbólkar við samsvarandi útbúgving og ábyrgd. Orsøkin er ongin onnur enn ein søguligur skeivleiki. Fíggjarmálaráðið krevur við sínum treiskni, at vit bara skulu góðtaka henda skeivleika.
Okkara áheitan er enn sum áður, at Fíggjarmálaráðið letur upp fyri lønarsamráðingum. Tað gevur lítla meining at skýra okkara krøv met høg, tá man als ikki nakrantíð hevur viljað samráðst um nøkur lønarkrøv.
Nú er tíð at rætta skeivleikan!«
