Leita á in.fo

Áki Bertholdsen 12.02.2019 (10:56)

Fongslaður í tríggjar vikur – fyribils

Ein maður er nú varðhaldsfongslaður í tríggjar vikur, fyri at hava sligið ein annan. Tað var sunnukvøldið, at løgreglan fekk boð um, at ein maður varð sligin í býnum í Havn. Maðurin, sum varð sligin, fekk ikki stórvegis men, men maðurin, sum sló, varð kortini handtikin og skuldsettur fyri harðskap.

 

Løgreglan hevði hann á støðini alla náttina og í gjár varð so gjørt av at royna at fáa hann varðhaldsfongslaðan. Tískil varð hann førdur fyri ein dómara seinnapartin í gjár, og dómarin var samdur við ákæruvaldið í, at maðurin skuldi varðhaldsfongslast. Í hesum sambandi varð hann varðhaldsfongslaður í tríggjar vikur, og hesa tíðina skal løgreglan so brúka til at útgreina málið, áðrenn maðurin aftur skal fyri rættin at fáa tann endaliga dómin.


Veitst tú eina góða søgu? Skriva til okkara á red(at)in.fo
Les ella lýs í Lýsingartorginum – trýst her