Ósemjan millum Pedagogfelagið og Kommunala Arbeiðsgevarafelagið kann fara at kosta foreldrum dýrt. Helst verða fleiri foreldur, sum ikki kunnu fara til arbeiðis í morgin, men tey skulu trekkjast í løn.
Orsøkin er einføld. Starvsfólk, sum ikki møta til arbeiðis, tí tey ikki fáa børn síni ansað, hava ikki rætt til løn.
Hesum hevur Føroyar Arbeiðsgevarafelag boðað limum sínum frá í kunnig, sum felagið hevur sent út í sambandi við, at Kommunala Arbeiðsgevarafelagið hevur lýst verkbann fyri allar námsfrøðingar og hjálparfólk, ið eru limir í Føroya Pedagogfelag.
Verkbannið er galdandi frá hósdegnum 14. desember 2017 kl. 07.00.
Føroya Arbeiðsgevararfelag leggur afturat, at um arbeiðssteðgur verður á økinum hjá øðrum feløgum, er tað sama galdandi, at foreldur, sum ikki møta til arbeiðis vegna manglandi barnaansing verða trekt í løn.
