Fýra fólk vórðu sambært løgregluni í gjár funnin deyð í einum sethúsum í bygdini Torpo í mið Noreg.
Tey vórðu funnin, at at løgreglan fyrr um kvøldið varð farin í á staðið eftir fráboðan frá stúrandi fólkum í familjuni.
– Tá løgreglan kom á staðið, funnu tey fýra fólk í húsunum. Øll vórðu staðfest deyð, hevur Brit Fyksen, løgregluleiðari, greitt frá í nátt.
Tá ongar ábendingar eru um, at onnur fólk hava verið uppi í hendingini, leitar løgreglan ikki eftir øðrum illgerðarmonnum.
Kriminalteknikarar koma á staðið um eitt tíðina í nátt.
Norska kriminalløgrelan, Kripos, er eisini við í kanningararbeiðinum.
Átaksleiðarin Torben Henriksen upplýsti klokkan 01.03 í nátt norska tíð fyri fjølmiðlum á staðnum, at løgreglan hevur eina fatan av, nær persónarnir eru deyðir.
– Vit hava eina ábending um, nær teir eru deyðir, men vit vilja ikki siga nakað í smálutum enn. Tað kemur kanningararbeiðið at vísa, varð sagt.
Torben Henriksen vildi ikki viðmerkja, um løgreglan hevur lagt hald á nakrar lutir, ella um tey kanska hava funnið vápn í húsinum.
Heldur ikki vildi hann upplýsa um aldur ella kyn á teimum fýra fólkunum.
Brit Fyksen hevur upplýst, at teir fýra persónarnir búðu á adressuni, og at familjan hevur fingið boðini.
– Tað er ov tíðliga at siga nakað um sambandið millum tey deyðu, síðani tey ikki formliga eru eyðmerkt, segði hon.
Løgreglan heldur tíðindafund klokkan 10 okkara tíð í morgun.
Solveig Vestenfor, borgarstjóri í kommununi Ål, sum bygdin er í, hevur sagt hendingina vera djúpt tragiska.
– Tá slíkt hendir í einum lítlum lokalsamfelag, rakar tað serliga hart, hevur hon sagt.
Bygdin Torpo í Noreg er í fólkatali á stødd við eina miðalstóra føroyska bygd sum Hósvík ella Kvívík. Har búgva um 300-400 fólk í Torpo.
/ritzau/NTB
