Leita á in.fo

Eirikur Lindenskov 11.01.2017 (16:51)

Ger títt egna telduspæl í Klaksvík

Nú verður Global GameJam-tiltak í Føroyum, sum gongur út upp á at savna fólk at gera telduspøl innan fyri eitt avmarkað tíðarskeið

 

– Kom og ger eitt telduspæl. Vikuskiftið 20. til 22. januar verður Global GameJam kring allan heimin, og í tí sambandi skipa sjálvbodnir spælsmiðir fyri einum GameJam í Íverksetarahúsinum í Klaksvík, sum verður partur av altjóða tiltakinum, har fólk fáa møguleika at gera sítt egna telduspæl frá grundini. Tiltakið er ókeypis, og øll kunnu melda seg til.

 

Tað skrivar Íverksetarahúsið í tíðindaskrivi.

 

GameJam er viðkomandi fyri øll, sum hava áhuga fyri at gera telduspøl. Í stuttum gongur tað út upp á at framleiða eitt telduspæl frá grundini innanfyri 48 tímar, og síðan at vísa tað fram.

 

Ymiskir førleikar og eginleikar skulu til fyri at gera eitt telduspæl. Forritarar, grafikarar, søguskrivarar, teknarar, málarar, ljóðsnillingar, tónleikarar og onnur fólk kunnu eiga sín lut í at gera eitt telduspæl. Tó er ikki neyðugt at hava aðrar førleikar enn ein sunnan áhuga fyri spælmenning fyri at luttaka í tiltakinum.

 

Endamálið við GameJam er at skapa eitt grundarlag fyri, at vit kunnu gera okkum galdandi innan stóru og skjótt vaksandi gamingvinnuna, sum livir og nørist í okkara grannalondum. Global Game Jam er heimsins størsta tiltak innan spælmenning, í 2016 vóru yvir 36.000 luttakarar í 93 londum kring heimin, og nærum 6800 telduspøl vórðu gjørd upp á eitt vikuskifti.

 


Veitst tú eina góða søgu? Skriva til okkara á red(at)in.fo
Les ella lýs í Lýsingartorginum – trýst her