Tað endaði eydnusamt kortini hjá føroyska U19 kvinnulandsliðnum í fótbólti.
Fyrr í dag fingu tær onga hjálp frá Armenia, og tær endaðu aftanfyri Turkaland á fyrsta plássinum við verri málmuni.
Men nú allir seks undanbólkarnir í deild B eru avgreiddir, so standa Føroyar sum besti tveyarin, og einasti ósigraði tveyarin.
Útfallið av tí er, at Føroyar vinna seg víðari í EM-undankappingini, og tær skulu tí kappast í A-deildini seinni í ár.
Føroyar spældu 1-1 móti turkisku vertunum, og tær vunnu 3-1 á Armenia.
Fyri stuttum vann føroyska U17 kvinnulandsliðið seg víðari til A-deildina á heimavølli á Tórsvølli, so hetta eru góðir dagar hjá føroysku kvinnu-ungdómslandsliðunum.