Tað var KJ hydraulik á Kambsdali, sum er ársins virkið í ár.
Tað varð avdúkað á vinnudegnum í Norðurlandahúsinum beint nú.
KJ hydraulik ger aliringar, tvíkiljur, og nógv annað til bæði føroyingar og uttanlands og tilsamans arbeiða eini 100 fólk hjá fyritøkuni. Nógv tey flestu eru í Føroyum.
Tá ið teir fingu virðislønina, varð fortalt, at á seinasta vinnudegi var tað ein, sum bar upp á mál, at tey skuldu gloyma alt um Silicon Valley, tí tey skuldu hugsa um Kambsdal.
Og tað hevur dómsnevndin tikið til eftirtektar. Á KJ hildu tey, at hetta var at gera nakað nógv av, men at tey kortini tóku tað sum eitt herðaklapp -afturat heiðrinum.
