– Lat bara tað almenna gera alt! Tað er stutta viðmerkingin hjá Gordon Rajani, stjóra í Mark, sum hevur bygt 80 leiguíbúðir í Havn, nú fleiri uppskot eru um, at tað almenna skal byggja leigubústaðir
Fólk í privatu vinnuni, sum fáast við bústaðir, eru ikki fegin um, at fleiri uppskot nú eru komin á tingborð, sum vilja lata tað almenna byggja leigubústaðir.
Sonja Jógvansdóttir hevur lagt uppskot fyri løgtingið, sum skal loyva kommunum at byggja íbúðir.
– Hetta uppskotið tykist sera illa umhugsað og tykist bert at hava til endamáls at vinna nakrar atkvøður. Uppskotið tekur ikki atlit til kappingaravlagandi støðuna, sum longu er á marknaðinum, men ger støðuna enn verri í framtíðini, um uppskotið verður samtykt. Politikarar, sum leggja slík lógaruppskot fram, eiga at lýsa støðuna betri, heldur Gordon Rajani, stjóri í Mark.
Hann vísir á, at er vónleyst hjá privatu vinnuni at kappast við tað almenna og tekur Tórshavnar kommunu sum dømi. Har starvast eini 2.000 fólk, so tey klára alt projekteringsarbeiðið og alla útføringina av einum byggjaríi sjálvi – t. v. s. at vinnurekandi arkitektar, verkfrøðingar og handverkar hava ongan møguleika at kappast við tímalønirnar hjá kommununi.
– Harafturat eigur kommunan longu byggilendi nógvastaðni og hevur tískil ongar útreiðslur til keyp av jørð. Privata vinnan má harafturímóti keypa byggilendi og aðrar veitingar fyri marknaðarprís. Hetta gevur kommununi ein so stóran kappingarfyrimun, at vinnulívið akkurát tað sama kann flagga út, heldur stjórin í Mark.
Og hann spyr, um hetta er tað, sum vit í Føroyum ynskja?
– Skal kommunuskatturin hjá privatu føroyingum stuðla undir byggjaríi hjá tí almenna og samstundis niðurlaga vinnuligt virksemi í landinum?
– Vit hava í dag ein vælfungerandi privatan marknað, har privata vinnan rindar vanligar marknaðarprísir fyri eitt nú ráðgeving, handverkarar, asfaltering o.s.fr. Hví skulu kommunur og aðrir almennir myndugleikar sum t. d. Bústaðir, virka til at privati marknaðurin verður avskeplaður, spyr hann og vísir á, at hetta eisini fer at merkja, at um privata vinnan sendur eina umsókn til kommununa um byggiloyvi til leigubústaðir, so er tað størsti kappingarneytin (kommunan), sum skal seta krøv og vælsigna prosjektið.
– Hetta er púra burturvið, heldur hann.
– Og hvat so við vanliga fólkinum í Føroyum? Hvat kunnu tey vænta í framtíðini? Tað kundi kanska verið gott um kommunurnar bygdu sethús fyri undirprís – so høvdu vit eisini kunna sloppu frá risastóru lánunum. Hvar steðgar galskapurin hjá politikarunum?
Gordon Rajani sigur, at teimum dámar betriuppskotið hjá Fólkaflokkinum og uppskotið hjá Sjálvstýri, um tað var tillagað nakað.
– Okkum dámar ikki, at kommunurnar av sínum eintingum fara at byggja bústaðir og harvið kappast við privatu vinnuna.
– Um kommunurnar harafturímóti fáa heimild at samstarva við privatu vinnuna á sama hátt, sum kommunan í dag samstarvar við Bústaðir, so er hetta sjálvsagt áhugavert. Hetta hevði givið okkum møguleika fyri at gera konstruktivar loysnir saman við kommununum kring alt landið, og harvið bygt nógv meira enn tær 80 íbúðirnar, sum vit longu hava bygt. Við hesum leisti hevði kappingin á bústaðarmarknaðinum verið meiri jøvn, og bústaðarneyðin verið loyst eftir stuttari tíð, sigur Gordon Rajani, stjóri í Mark.
