Í dag skulu týskarar gera av, hvør skal stjórna landinum næstu árini.
Her er eitt yvirlit yvir flokkarnar, sum týskarar kunnu velja í dag.
* CDU: Kristindemokratiski flokkurin er størsti konservativi flokkur í Týsklandi.
Flokkurin er millum annað vælumtóktur í ovara miðalklassanum. Undir leiðsluni hjá samveldiskanslaranum Angelu Merkel hevur flokkurin otað seg nærri miðuni.
Á síðsta vali fekk CDU 34,1 prosent av atkvøðunum.
* CSU: Bayerski systurflokkurin hjá CDU er eitt sindur meira konservativur og fanst harðliga at avgerðini hjá Angelu Merkel at taka ímóti hundraðtúsundavís av flóttafólkum í 2015.
Á síðsta vali fekk CSU 7,4 prosent av atkvøðunum.
* SPD: Týski Javnaðarflokkurin verður vanliga stuðlaður av arbeiðaraklassanum og valdsmiklu fakfeløgunum.
Men hóast fleiri sigrar sum samstarvsflokkur í stjórnini seinastu fýra árini hevur flokkurin og kanslaravalevni floksins, Martin Schulz, havt trupult við at sannføra veljararnar um at atkvøða fyri SPD.
Á síðsta valið fekk SPD 25,7 prosent av atkvøðunum.
* FDP: Tann liberali flokkurin, sum er fyri at styrka fría marknaðin, hevur verið longri í stjórn enn nakar annar flokkur.
Á seinasta vali fekk FDP 4,8 prosent av atkvøðunum, og flokkurin fekk tí ikki sæti í Samveldisdegnum.
* Tey Grønu: Umhvørvisflokkurin hevur millum annað havt stóran leiklut í at fáa Týskland burtur frá kjarnorku og fyri at leggja størri dent á rættindi hjá samkyndum.
Men eftir at kjarnuøkini eru vorðin meira mainstream, hevur tað verið trupult hjá flokkinum at varðveita veljararnar.
Á síðsta vali fingu Tey Grønu 8,4 prosent av atkvøðunum.
* Die Linke: Vinstraflokkurin varð stovnaður av kommunistum úr fyrrverandi Eysturtýsklandi. Hann hevur higartil verið størsti andstøðuflokkurin.
Friðarhugaði flokkurin krevur millum annað, at Nato verður upployst, og at týskar herðdeildir verða tiknar heim.
Á síðsta vali fekk Die Linke 8,6 prosent av atkvøðunum.
* AfD: ES- og innflytarakritiski flokkurin varð stovnaður í 2013.
Mongdin av asýlsøkjarum, sum komu til Týskalnds í 2015, góðu flokkinum undanvind.
AfD tykist fáa pláss í Samveldisdegnum fyri fyrstu ferð. Men har er eingin, sum vil samstarva við flokkin.
Á síðsta vali fekk flokkurin 4,7 prosent av atkvøðunum.
* Fleiri aðrir flokkar stilla upp á týska valinum, sum valla vinna seg upp um sperrimarkið, sum í Týsklandi er 5 prosent.
Keldur: AFP, Politico Europe.
/ritzau/
