Countrysongkvinnan verður við á Summar Festivalinum í august
Kristina Bærendsen verður við á Summar Festivalinum í ár, og hon fer at hava konsert leygardagin á ársins festivali.
Kristina Bærendsen er millum landsins bestu songkvinnur, og sum tulkari av country- og gospelsangum er hon framúr. Hon er væl umtókt bæði í Føroyum og í grannalondunum. Fyrr í ár luttók Kristina í íslendska Grand Prixnum við sera vøkrum countrypoppsangi, og fyri kortum framførdi hon í Danmark.
Kristina Bærendsen hevur áður verið á stóra palli á Summar Festivalinum. Hon sang duett við countrylegenduni Bobby Bare, og í fjør gjørdist konsertin við henni minnilig, tí hon mátti steðgast, tá ið tað fór at regna illa inn á pallin og tøknin sveik.
Nú kemur Kristina Bærendsen aftur á Summar Festivalin við fullari manning, og lagt er upp til eina framúr seinnapartskonsert á Vágsbøi við dugnaligu songkvinnuni.
Summar Festivalurin verður hildin í døgunum frá 10. til 12. august. Mikukvøldið á midnátt hækkar prísurin á atgongumerkjum.
