Lars Løkke Rasmussen ávarar føroyingar

Hann vil takast við upp á ráð, áðrenn føroyingar taka endaliga avgerð

- Tað sigur seg sjálvt, at ein føroysk grundlóg má verða innanfyri karmarnar í ríkisfelagsskapinum.

 

Tað staðfesti danski forsætisráðharrin, Lars Løkke Rasmussen, í orðaskiftinum, tá ið Fólkatingið varð sett .

 

Hann sipar til ætlanina hjá nýggju samgonguni at gera eina føroyska stjórnarskipan, sum ”skal staðfesta, at Føroya fólk hevur valdið í Føroyum”, sum tað stendur í samgonguskjalinum.

 

Tað stendur eisini í samgonguskjalinum, at lógin skal áseta og útgreina sjálvsavgerðarrættin og fólkaræðisliga stýrislagið hjá Føroya fólki.

 

Og samgongan er samd um, at í seinasta lagi í 2017, skal fólkaatkvøða verður í Føroyum um eina nýggja stjórnarskipan.

 

Lars Løkke Rasmussen er fullgreiður yvir, at tað er eitt viðkvæmt mál, men hann leggur dent á, at danska stjórnin er sinnaðir at samskifta við føroyskar myndugleikar um eina føroyska grundlóg.

 

- Føroyingar hava fullan rætta at gera sína egnu grundlóg. Men tað er greitt, at ein føroysk grundlóg hevur ikki bara týdning fyri Føroyar, hon hevur eisini týdning fyri Danmark, tí vit eru í ríkisfelagsskapi, gjørdi danski forsætisráðharrin greitt í Fólkatinginum í gjár.

 

Hann sigur, at tískil má ein nýggj, føroysk grundlóg sjálvandi liggja innanfyri karmarnar í ríkisfelagsskapinum. Tað merkir, hon skal vera í samsvari reglurnar í grundlógina, vit hava, sigur hann.

 

Lars Løkke Rasmussen sigur, at hann hevur bjóðað Aksel V. Johannesen, løgmanni, at samskifta við donsku myndugleikarnar um eina nýggja, føroyska grundlóg.

 

Tá ið føroyskir myndugleikar eru komnir longri í arbeiðnum at gera eina nýggja føroyska grundlóg, væntar hann, at samskifti verður tikið upp við ríkismyndugleikarnar fyri at tryggja, at ein føroysk grundlóg kann sameinast við ríkisfelagsskapin, segði Lars Løkke Rasmussen.