Fimm døglingar lagt beinini í Hvalba

Tá ið hvalbingar komu á føtur í morgun, varnaðust teir, at fimm døglingar høvdu svomið seg upp á turt, beint við bryggjuna á Bíargarði.

Tað er rættiliga sjáldsamt at so nógvir døglingar leggja beinini ísenn.

Døglingarnir eru avlívaðir og tiknir upp á bryggjuna, har teir vera skornir upp beint nú.

Døglingar verða skiftir til fólkið í kommununi.

Hvalbingar siga, at økið rundan um har, teir skera upp, er avbyrgt sum arbeiðsøki, har er vaktarhald, so at eingin, sum ikki hevur við málið at gera, sleppur inn um.  

Umboð fyri Sea Shepherd hava annars staðið trúliga á Kolavegnum í Hvalba og hildið vakt, bæði nátt og dag. Men har er púra einki hent alla hesa tíðina, tey hava verið her, so tað hevur helst verið nakað langligt hjá teimum.

Og hvalbingar, sum koyrdu framvið teimum í nátt, siga, at tá sótu tey í bilinum og svóvu.

Tey hava annars verið á vegnum omanfyri har døglingarnir verða skornir upp, men tey vóru bara eina lítla løtu, áðrenn tey hvurvu aftur, siga hvalbingar.