Leita á in.fo

Jákup Mørk 08.09.2014 (18:38)

Føroyskir milliardingar

Boykotti hjá vesturheiminum av Russlandi hevur skapt fyrstu milliardingarnar í Føroyum.

 

Heimasíðan, business.dk, skrivar í dag, at Regin Jacobsen, stjóri á Bakkafrost, og mamma hansara, Oddvør Jacobsen, nú eiga partabrøv, sum tilsamans eru verd meira enn 1,1 milliard krónur.

 

Tey bæði eiga ávikavist 9,2 og 9,4 prosent av partabrøvunum í Bakkafrost. Samlaða kursvirði hjá Bakkafrost hækkaði eini 20 prosent, tá Føroyar ikki vildu taka lut í handilsforðingunum mótvegis Russlandi, og samlaða virðið er í dag 6,1 milliard krónur.

 

Tá Bakkafrost varð skrásett á norska virðisbrævamarknaðinum í 2010, var samlaða virðið á fyritøkuni mett til 1,1 milliard. Saman við Regini Jacobsen fær fíggjarstjórin, Teitur Samuelsen, stórt herðaklappa frá norskum greinarum. Teir báðir hava sambært greinarunum staðið á odda fyri tí menningini av heimsins besta leiðsluhátti, skriva norskir miðlar.

 

- Tá tað snýr seg um management, snýr tað seg um annað og meira enn bert lágt kostnaðarstøði, skriva greinararnir. Ikki minst rósa teir góða fóðrinum, sum Bakkafrost umvegis Havsbrún letur alda laksinum. Heilstøðan í føroyskari aling er eisini millum heimsins bestu, og tí eru keyparar kring allan heim til reiðar at gjalda meira fyri føroyskan aldan laks, enn teir vilja fyri laks úr øðrum londum, verður mett.


Veitst tú eina góða søgu? Skriva til okkara á red(at)in.fo
Les ella lýs í Lýsingartorginum – trýst her