Í morgin verða politikararnir stillaðir til svars

- Er politiski viljin til staðar at fremja neyðugu átøkini? spyrja fyriskipararnir av pallborðskjaki um veðurlagsbroytingar

 

Í annaðkvøld verður pallborðskjak í Norðurlandahúsinum um orku, veðurlagsbroytingar og náttúruvernd.

Tað eru Ringrás og FNU, sum skipa fyri tiltakinum í samstarvi við Norðurlandahúsið. Fyriskipararnir siga soleiðis:

- Avleiðingarnar av mannaskaptu veðurlagsbroytingunum gerast alsamt týðiligari, og vit verða mint á, at vit mugu seta átøk í verk beinanvegin fyri at basa teimum. Hesi átøk eru tilreiðar at gera Føroyar meira sjálvbjargnar og burðardyggar.

- Men er politiski viljin til staðar at raðfesta og fremja neyðugu átøkini, og verða hesi framd nóg skynsamt, soleiðis at orkunýtslan ikki máar burturav føroysku náttúruni? 

Hvat ætla valevnini?

Sambært altjóða veðurlagsnevndini hjá ST, IPCC, er neyðugt at minka útlátið við heili 45% fram til 2030, sammet við 2010, fyri at avmarka fylgjurnar av veðurlagsbroytingum, eins og samtykt var at gera við París sáttmálanum, sum Føroyar hava bundið seg til.

- Hvat ætla valevnini til komandi løgtingsval ítøkiliga at gera fyri at røkka hesum máli? Hetta koma umboð úr teimum 8 politisku flokkunum, sum stilla upp til komandi løgtingsval, at kjakast um.

##med2##

Serkønir faktatjekkarar

Áðrenn kjakið koma Kári Mortensen, deildarleiðari á Orkudeildini hjá Umhvørvisstovuni, og Bogi Hansen, havfrøðingur, ávikavist at greiða frá góðu møguleikunum at gerast leys av oljuni, og møguligu avleiðingunum, um vit lata standa við.

Kári Mortenen og Bogi Hansen eru harumframt partur av einum toymi av faktatjekkarum, sum hevur møguleika at koma við rættleiðingum og viðmerkingum, um tey halda tað vera neyðugt og gagnligt fyri kjakið.

Í hesum toyminum eru:

- Ragnheiður Bogadóttir, humanvistfrøðingur
- Kári Mortensen, deildarleiðari á Orkudeildini hjá Umhvørvisstovuni
- Bogi Hansen, havfrøðingur
- Jógvan D. Hansen, heimspekingur

Pallborðsfundurin verður mikudagin 15. mai kl. 19:00 í Høllini í Norðurlandahúsinum.