Leita á in.fo

Henrik Old, nú landsstýrismaður í samferðslumálum.

Hallur av Rana 19.09.2015 (20:32)

Innlendismálaráðið bleiv til Samferðslumálaráðið

Hóast samgonguskjalið millum Javnaðarflokkin, Tjóðveldi og Framsókn varð undirskrivað mánadagin, og landsstýrisfólkini tilnevnd týsdagin, so gjørdist flokkarnir ikki heilt lidnir við tað seinasta av málsøkjabýtinum fyrr enn í fríggjadagin.


Hóast landsstýrisfólkini vóru tilnevnd, so manglaðu samgonguflokkarnir at fáa tað síðsta av býtinum upp á pláss viðvíkjandi hvørji mál hoyrdi undir hvørji aðalráð.


Sjónligasta broytingin er, at Henrik Old, ið varð tilnevndur til landsstýrismann í Innlendismálum, fríggjadagin fekk eitt nýtt heiti, tá aðalráðið broytti navn til


Samferðslumálaráðið. Sostatt er Henrik Old landsstýrismaður í samferðslumálum.
Innlendismálaráðið hvørvir ikki heilt, men í staðin verður navnið skoytt upp í heilsumálaráðið, soleiðis at Sirið Stenberg framyvir er landsstýriskvinna í heilsu- og innlendismálum.


Frammanundan var longu greitt, at Poul Michelsen, formaður í Framsókn, fór at taka við landsstýrissessinum í vinnumálum, har eisini uttanríkismál fóru at vera ein partur. Sostatt verður hann landsstýrismaður í uttanríkis- og vinnumálum.


Hini stjórnarráðini eru Løgmansskrivstovan, Fiskimálaráðið, Fíggjarmálaráðið, Almannamálaráðið og Mentamálaráðið.


Trýst her fyri at lesa kunngerðina frá Aksel V. Johannesen, løgmanni, um málsøkjabýtið hjá CEF-samgonuguni.


Veitst tú eina góða søgu? Skriva til okkara á red(at)in.fo
Les ella lýs í Lýsingartorginum – trýst her