Leita á in.fo

Hallur av Rana 24.07.2015 (17:45)

Noktaðu seg sek

Rættarfundur hevur verið í Føroya rætti í dag. Endamálið við fundinum var at taka støðu til, um løgreglan hevði heimild at handtaka Sea Shepherd limirnar, umframt at leggja hald bátin og annað tilfar, tá grindadráp var í Bø í gjár. Harumframt bað ákærin, Linda Hesselberg, dómaran um loyvi til at kanna tað videotilfar, ið løgreglan hevði lagt hald á.

Tey handtiknu verða øll ákærd fyri brot á grindalógina. 


Verjin hjá teimum ákærdu, Jógvan Páll Lassen, upplýsti, at tey ákærdu øll noktaðu seg sek. 


Tey ákærdu í málinum eru Rosie Kunneke, Suðurafrika, og Christophe Bondue, Belgia, ið vórðu tikin á landi, og Xavier Figarella, Frakland, og Marianne Baldo, Italia, ið vórðu tikin á sjónum.


Dómarin metti, at løgreglan hevði borið seg rætt at, og gav eisini ákæruvaldinum loyvi at kanna tær upptøkur, ið tey høvdu fingið fatur á. Talan er um eitt GoPro myndatól frá sandinum og eitt myndatól og minniskort til myndatólið, ið var í bátinum.


Fleiri upplýsingar frá rættarfundinum koma út á in.fo gjøgnum kvøldið.  


Veitst tú eina góða søgu? Skriva til okkara á red(at)in.fo
Les ella lýs í Lýsingartorginum – trýst her