Leita á in.fo

Vilmund Jacobsen 28.08.2014 (21:44)

Sea Shepherd bar wc-pappírið aftur

Í dag hava Sea Shepherd-fólk verið á gátt hjá Sands kommunu.

 

Sum in.fo skilir, vóru ørindini eitt nú at bera aftur wc-pappír, sum tey eru løgd undir at stjala á almenna wc’inum á Munkinum á Sandi.

 

Myndamaðurin, sum tók viðheftu mynd, veit at siga, at Sea Shepherd-fólkini bóru wc-pappír við sær, tá tey gingu úr bilinum og yvir til hurðina, har Sands kommuna heldur til.

 

Borgarstjórin í Sands kommunu, Brandur Sandoy, váttar, at Sea Shepherd-fólk hava verið á gátt hjá kommununi.

 

Hann vísir á, at tey vórðu biðin um at taka tað við sær aftur, sum tey komu á gátt við. Brandur sigur tó ikki beinleiðis, at talan var um wc-pappír.

 

- Jú, tey vóru her í kommununi, men tey fingu sama svar sum áður - at tey ikki eru vælkomin at brúka fasilitetirnar hjá okkum. Tað, sum tey høvdu við sær, vórðu tey biðin um at taka við sær aftur, tá tey fóru.

 

Brandur Sandoy sigur, at nú ferðafólkatíðin er av á hesum sinni, eru húsini á Munkinum stongd, og nú verður húsið aftur brúkt til undirhús.

 

- Sea Shepherd-fólkini, sum vitjaðu í dag, høvdu ilt við at góðtaka, at vit hava sýtt teimum fasilitetirnar. Tey gjørdust ikki sørt firtin, tá tey sóu, at eg ikki vildi taka ímóti.

 

Brandur Sandoy sigur, at tey ætlaðu sær at banda samrøðuna við hann.

 

- Men, eg gav teimum boð um, at so skuldi ikki vera. Tað respekteraðu tey - so vítt eg veit, sigur borgarstjórin í Sands kommunu.


Veitst tú eina góða søgu? Skriva til okkara á red(at)in.fo
Les ella lýs í Lýsingartorginum – trýst her