Leita á in.fo

Danjal av Rana 22.01.2016 (11:50)

Sea Shepherd møtti ikki

Í morgun byrjaði enn eitt rættarmál í Føroya Rætti móti Sea Shepherd. Hesa ferð var tað millum annað skilaleysa siglingin hjá skjóttgangandi bátinum Echo, sum ákæra var reist um.

 

18. novembur, beint eftir at hann hevði luttikið á fundi um grindadráp á Christiansborg, varð rættarmálið kunngjørt fyri altjóða leiðaranum í Sea Shepherd, Ale Cornelissen. Hann fekk tá boð um at møta í Føroya rætti 22. og 25. januar, har felagsskapurin varð ákærdur fyri brot á millum annað grindalógina og revsilógina. Geert Vons, leiðari fyri Sea Shepherd Holland, var eisini kunnaður um rættarfundin, eins og sakførarin hjá Alex Cornelissen.

 

Tó so, tá málið byrjaði í Føroya rætti í morgun, var eingin av ákærdu møttur. Ákæruvaldið metti, at hetta ikki átti at fáa nakra ávirkan, og at rættarfundurin kortini kundi halda fram. Linda Margrethe Hesselberg, ákæri, vísti á, at Alex Cornelissen longu 18. novembur hevði gjørt greitt, at hann ætlaði ikki at úttala seg um málið og at onnur umboð fyri Sea Shepherd ferð eftir ferð hava givið til kennar, at tey ikki viðurkenna føroysku rættarskipanina. Hon gjørdist tí als ikki ovfarin av, at eingin var komin.

- Atlantic Airways hevur eisini váttað fyri løgregluni og ákæruvaldinum, at Alex Cornelissen ikki hevur bílagt ferðaseðil til Føroya. Ei heldur hava onnur umboð fyri Sea Shepherd keypt sær ferðaseðil, segði hon.

 

Hon metti tí, at tey við vilja hildu seg burtur frá rættarfundinum, og at hetta var grundarlag nokk til at lata rættarfundin halda fram, hóast teirra fráveru.

 

Verjin, Jógvan Páll Lassen, var sum vera man ósamdur. Hann helt ikki, at tað var at meta sum ólóglig frávera, at eingin teirra var komin til Føroya. Hann vildi vera við, at sambært lógini kravdi tað, at ein gjørdi okkurt óvanligt, so sum at ein rýmdi undan ella krógvaði seg, um ein skuldi roknast at hava ólógliga fráveru. Ikki at ferðast úr Hollandi til Føroya kom ikki undir hetta, metti verjin.

 

Dómarin var samdur við verjanum og vildi tí ikki ganga áheitanini frá ákæranum, um at lata rættarmálið ganga, á møti. Málið er tí útsett, inn til ákæruvaldið megnar at fáa fatur á ákærda og fáa hann at møta upp.

 

Ákæruvaldið kærdi avgerðina hjá dómaranum til Eystara Landsrætt.


Veitst tú eina góða søgu? Skriva til okkara á red(at)in.fo
Les ella lýs í Lýsingartorginum – trýst her