Leita á in.fo

Jákup Mørk 14.04.2014 (19:26)

Todi millum teir størstu

Í gjár varð Todi Jónsson sjálvur annar av teimum, sum løgdust afturat sonevnda Legends Club hjá FCK. Saman við Diego Tur, sum í síni tíð var stinnur verjuspælari á liðnum, varð Todi heiðraður, tá FCK í gjár spældi móti AGF.

 

- Eg eri sjálvandi errin um, at eg eri upptikin í Legends Club. Við stuttu søguni hjá FCK og við teimum góðu árunum, sum eg hevði í felagnum, so hevði eg helst eisini roknað við, at eg slapp upp í part. Eg spældi hóast alt her í átta ár, og eg var við til at vinna trý meistaraheiti og tvær steypakappingar. Og í fleiri ár var eg mest skorandi spælarin í søgu felagsins. Men tá tað er sagt, so stendur framvegis eftir, at eg eri errin. Og hetta er nakað, sum eingin fær tikið frá mær, sigur Todi Jónsson um heiðurin.

 

- FCK er sjálvandi eitt rættiliga ungt felag, men kortini hevur ein slíkur Legends Club stórt virði. Sæð frá einum sponsor-sjónarmiði, so kann tað skapa øktan loyalitet, um fyrrverandi spælarar soleiðis virka sum ambassadørar fyri felagið. Og onkursvegna kann hetta væl eisini vera við til at styrkja felagskensluna. Eg eri sjálvandi ikki uppaldur í FCK, men eg spældi her í nógv ár, og míni bestu fótbóltsár vóru her í felagnum, so hetta er ein partur av mínum DNA, sigur Todi Jónsson.

 

Todi Jónsson spældi 167 dystir fyri FCK, og hann skeyt 54 mál fyri felagið. Hetta seinna var leingi met í felagnum, men í dag hava Cesar Santin og Dame N'Doye yvirhálað klaksvíkingin.

 

Sonevndi Legends Club hjá FCK er eitt nýtt fyribrigdi hjá nú 22 ára gamla felagnum. Fortreytin fyri upptøku er, at viðkomandi ikki longur er aktivur á vøllinum, og at hann ella hon í stóran mun hevur gjørt vart við seg fyri felagið. Nú Todi Jónsson og Diego Tur eru við í felagsskapinum, eru 12 limir. Roknað verður við, at onkrar felagskempur afturat verða upptiknar í heyst.

 

- Eitt felag við eini somikið sterkari søgu eigur at heiðra teimum stóru persónligheitum og stjørnum, sum hesi 22 fyribils fyrstu árini hava givið okkum. Søgan skal gevast víðari til komandi ættarlið, so hon ikki verður gloymd, men ístaðin er við til at skapa íblástur og gleði. Legends Club er eitt hugskot, sum vit hava havt leingi, og nú halda vit, at tíðin er búgvin til hetta, sigur Anders Hørsholt, sum er stjóri í FCK.

 

Á heimasíðu felagsins, www.fck.dk, sæst videobrot frá løtuni, tá Todi verður upptikin í FCK Legends.


Veitst tú eina góða søgu? Skriva til okkara á red(at)in.fo
Les ella lýs í Lýsingartorginum – trýst her