Stella-Polaris vinnari konsert í Havn

Fyrr í ár kallaðu dómararnir unga føroyingin fyri eina sanna stjørnu. Nú ber til at hoyra hann á konsert í Havn

 

Alvi Joensen, høgrumegin, hevur konsert í Havn sunnudagin, saman við Max Näpel

Alvi Joensen, høgrumegin, hevur konsert í Havn sunnudagin, saman við Max Näpel

Sunnudagin skipar Konsertfelagið fyri konsert við Stella Polaris vinnaranum, Alva Joensen. Við sær hevur hann guitarleikaran, Max Näpel, og saman manna teir eina guitarduo, teir nevna, Nordic Guitar Duo.

 

Alvi Joensen er 24 ára gamal og uppvaksin í Norðagøtu. Longu átta ára gamal, fór hann at spæla guitar í musikskúlanum í Gøtu.

 

- Musikkskúlin í Gøtu hevur havt stóran týdning fyri tónleikaáhugan og menningina hjá Alva - serstakliga hevur tónleikalærarin tey fyrstu árini, Magnus Jakobsen, havt ein týðandi leiklut, og var tað hann, ið gav Alva innlit í klassiskan guitartónleik, sigur Konsertfelagið.

 

Seinnu árini í musikskúlanum í Føroyum, var Alvi næmingur hjá guitarleikaranum, Ólavi Jakobsen, ið eisini hevur havt stóran týdning fyri Alva sum tónleikara.

 

Síðani 2010 hevur Alvi búleikast í Malmø í Svøríki, har hann í summar fekk masterprógv frá tónleikaháskúlanum, og í heyst fer hann undir diplomútbúgving á sama skúla.

 

Fyrr í ár vann Alvi Stella Polaris kappingini fyri ungar klassiskar tónleikarar. Dómararnir kallaðu hann eina sanna stjørnu við djúpum innliti í tónleiki.

 

Eisini Max Näpel fór at spæla guitar átta ára gamal, og í løtuni er hann næmingur á sama tónleikaháskúla, har hann júst er liðugur við eina bachelor útbúgving í tónleiki. Seinni í ár fer hann undir masterútbúgving.

 

Alvi og Max hava spælt nógv saman og teir samstarvaðu eisini próvtøkukonsertirnar á skúlanum í summar.

 

Og tað er nettupp ein partur av skránni á próvtøkukonsertini, har serliga suðuramerikanskur guitartónleikur fylti nógv, ið vit fáa høvi at hoyra í  Norðurlandahúsinum sunnudagin.