Hugburðinum bilti einki í kvøld. Í uppgerðini á Svangaskarði ímóti grannunum í NSÍ stríddust teir í B68, og í stuttum sekvensum funnu teir hvønn annan, og fleiri ferðir vóru spentar støður frammanfyri Tórð Thomsen í NSÍ málinum. Men tað eydnaðist ikki B68 at skora mál. NSÍ vann 1-0, og harvið var áttanda tapið hjá B68 á rað í landskappingini veruleiki.
Úrtøkan er fimm stig, og B68 er aftast. Landsliðssteðgurin kemur væl við hjá Jákupi á Borg og hansara monnum, nú tað eru 24 dagar inntil næsta dyst. Hann verður 19. juni, tá ið tey bæði botnliðini bresta saman á Skála.
Eisini NSÍ var í fleiri góðum støðum í brotsteiginum hjá mótstøðuliðnum, uttan at tað eydnaðist at vinna heilt stórar málmøguleikar.
Sigursmálið skoraði Pætur Hentze, tá ið seinni hálvleikur var eitt korter gamal. Í 3-5-2 leikskipan er hann vongverji í høgru. Í hinum borðinum er Pætur Turiðarson Skipanes vongverji, og tað var hann, sum átti innleggið, og við handara stólpa var tað Pætur Hentze, sum við høvdinum stýrdi bóltin í málið.
Meinhardt P. Joensen í B68 málinum ruddaði bóltin burtur, men linjudómarin gav til kennar, at bólturin hevði verið innanfyri málstrikuna.
22 ára gamli Pætur Hentze er í ár av álvara vorðin lyklaspælari í Runavík. Dysturin í kvøld var nummar 81 hjá honum í bestu deildini, sambært faroesoccer.com, og tilsaman hevur hann skorað fimm mál í landskappingini – eitt í 2017, eitt í fjør, og higartil í ár hevur hann skorað trý mál. Hann var tvífaldur málskjútti, tá ið NSÍ fyri stuttum vann 3-2 á Argjum.
Todi Jónsson og hansara menn hava nú vunnið fimm dystir, og tey 15 stigini bera við sær, at NSÍ nú er á sætta plássi. At talan var um triðja sigurin á rað ber boð um, at teir í Runavík eftir sera skinklandi og lítið sannførandi byrjan eru við at samanspæla lið, sum kann fara at vera við í kappingini um fimta plássið.
Næsta royndin hjá NSÍ verður 19. juni, tá ið NSÍ fær vitjan av HB.
B68 – NSÍ 0-1 (0-0)
0-1: Pætur Hentze 61.
Dómari: Eiler Rasmussen
B68: Meinhardt P. Joensen – Fríði í Túni Petersen (Esmar P. Clementsen, 64.), Aidan Liu, Hjalti Strømsten, Bárður Ó. Jensen – Áki Johannesen, Tonni J. Thomsen (Niels Jensen, 72.), Mohamed Samba (Steffan A. Løkin, 80.) – Boubacar Sidik Dabo, Sebastian Lau Nielsen, Gilli Samuelsen
Gult kort: Aidan Liu, Niels Jensen
Venjari: Jákup á Borg
NSÍ: Tórður Thomsen – Meinhard Debes Geyti, Oddur Á. Højgaard (Albert Róin Johannesen, 79.), Einar Tróndargjógv – Pætur Hentze, Jógvan Højgaard, Betuel Hansen, Mórits Heini Mortensen (Beinir Nolsøe, 79.), Pætur Turiðarson Skipanes (Búi Egilsson, 84.) – Hans Marius Davidsen, Klæmint A. Olsen
Gult kort: Mórits Heini Mortensen, Einar Tróndargjógv
Venjari: Todi Jónsson
-
KÍ | 11 | 10 | 1 | 0 | 33 | 1 | 31 |
Víkingur | 12 | 9 | 1 | 2 | 39 | 10 | 28 |
B36 | 11 | 6 | 1 | 4 | 24 | 10 | 19 |
HB | 11 | 5 | 4 | 2 | 23 | 16 | 19 |
EB/Streymur | 11 | 5 | 2 | 4 | 15 | 20 | 17 |
NSÍ | 12 | 5 | 0 | 7 | 18 | 30 | 15 |
AB | 12 | 4 | 1 | 7 | 20 | 34 | 13 |
07 Vestur | 11 | 2 | 3 | 6 | 11 | 28 | 9 |
Skála | 11 | 0 | 5 | 6 | 11 | 22 | 5 |
B68 | 12 | 1 | 2 | 9 | 8 | 31 | 5 |