Leita á in.fo

Hallur av Rana 08.10.2018 (22:11)

Per nývaldur í Kringvarpsstýrið

Per Højgaard, journalistur, er nýggjur limur í Kringvarpsstýrinum. Tað skrivar Vágaportalurin, ið eisini veit, at tað er Sambandsflokkurin, ið hevur tilnevnt Per Højgaard í ráðið.


Sostatt er Kringvarpsstýrið loksins fullmannað, aftaná at tað í fleiri mánaðir hevur mangla ein lim. Hjalmar Hansen var millum teir sjey limirnar í stýrinum, men legði sessin frá sær, tá hann fekk starv í Mentamálaráðnum.


Tey sum nú mannað stýrið eru Rúni Heinesen, formaður, Katrin Petersen, næstforkvinna, Gunvá við Keldu, Petur Elias Petersen, Theodor E.D. Olsen, Carsten M. Arnskov og Per Højgaard.


Stýrið fyri Kringvarp Føroya er mannað við sjey limum, ið landsstýriskvinnan tilnevnir eftir millum annað tilmæli frá politisku flokkunum og starvsfólkunum í Kringvarpinum.


Núverandi kringvarpsstýri varð tilnevnt av Bjørn Kalsø, táverandi mentamálaráðharra, 1. januar 2015. Av tí, at stýrið verður valt fyri fýra ár í senn, merkir tað, at landsstýriskvinnan í næstum skal tilnevna eitt nýtt stýri, ið tekur við 1. januar 2019.


Veitst tú eina góða søgu? Skriva til okkara á red(at)in.fo
Les ella lýs í Lýsingartorginum – trýst her