Sambært pólskum myndugleikum kom ein russisk rakett, sum var á veg móti Ukraina, inn í pólskt loftrúm sunnumorgunin.
Sagt verður, at rakettin var í pólskum øki í tilsamans 39 sekund, nærindis einari bygd á markinum millum Pólland og Ukraina.
Pólski uttanríkisráðharrin, Radoslaw Sikorski, hevur greitt Nato-aðalskrivaranum, Jens Stoltenberg, neyvt frá hendingini.
Uttanríkisráðharrin hevur eisini greitt aðalskrivaranum frá, hvørji stig Pólland hevur tikið eftir hendingina sunnumorgunin.
Hetta upplýsir pólska verjumálaráðið í dag, og tað er tíðindastovan NTB, sum endurgevur hesi tíðindi í kvøld.
