Leita á in.fo

Danjal av Rana 12.10.2017 (08:49)

Sjúrður uppførir seg sum ein hjálandastjóri

Sjúrður skal ikki blanda seg uppí

 

Hann uppførir seg sum ein hjálandastjóri, sigur grønlendskur politikkari.

 

Tað er einki nýtt í, at nakrir av limunum í ríkisfelagsskapinum fyrst og fremst hava fíggjarlig áhugamál í okkum, sigur Jess Svane, politiski framsøgumaðurin hjá Siumut sambært Sermitsiaq.

 

Hann biður tí Sjúrður Skaale gevast við at uppføra seg sum ein hjálandastjóri og ikki blanda seg upp í grønlandsk viðurskifti.

- Tað er eingin orsøk til, at føroyski limurin í Fólkatinginum, Sjúrður Skaale, skal blanda seg upp í grønlendsk viðurskifti, sigur Jess Svane sambært Sermitsiaq.

 

Bakgrundin er talan hjá Sjúrði Skaale, tá Fólkatingið varð sett 3. oktobur. Sjúrður Skaale vísti tá til ætlanirnar hjá grønlendska landsstýrismanninum í fiskivinnumálum, Karl-Kristian Kruse, um at í 2020 skulu 90 prosent av øllum yvirmonnum á grønlendskum skipum hava búð í Grønlandi í tvey ár.

 

Jess Svane sigur, at tað er eingin, sum roynir at kroysta føroyingar úr grønlendsku fiskivinnuni.

- Kravið um tvey ára bústað er nátúrligt, tí endamálið er at verja heimabúgvandi grønlendingarnar í fyritøkunum, sigur Jess Svane.

 

 


Veitst tú eina góða søgu? Skriva til okkara á red(at)in.fo
Les ella lýs í Lýsingartorginum – trýst her