Tá ið brúgvin um Sandá varð latin upp fyri almenninginum nakað eftir klokkan 16 seinnapartin, vóru tað tveir heilt serligir borgarar, ið sluppu at vera tey fyrstu um brúnna.
Í teimum báðum ellisakførunum, sum koyrdu fyrst um brúnna – ein av Argjum og ein úr Havnini – vóru nevniliga tveir eldri borgarar, sum búgva hvør sínu megin brúnna.
Tann, sum sat í ellisakfarinum, ið koyrdi av Argjum, var Sverri Mortensen, sum við sínum 94 árum er elsti borgari búsitandi á Argjum.
Í ellisakfarinum, sum kom úr Havnini, var Mathilda Jacobsen. Hon er 95 ára gomul og koyrir framvegis bil.
Tá ið bilarnir báðir hittust mitt á brúnni, steðgaðu teir á og fingu tey bæði høvi at heilsa upp á hvønn annan, eins og tey fingu handað blómutyssi.