Ein tunnil undir allari Hoyvíkini líka av Hvítanesi til Krákugjógv, sum er oman fyri bilasøluna Auto Service.
Annika Olsen, borgarstjóri í Havn, skjýtur nú upp nýtt alternativ til verandi loysn fyri innkomuvegin til Havnar.
– Ístaðin fyri klandur og stríð um ein dýran og fløktan innkomuveg gjøgnum bæði bygt øki, komandi byggiøki og náttúruøki, so mælir hon til at gera tunnil av Hvítanesi í Krákugjógv, skrivar Tórshavnar býráð í kvøld.
– Innkomuvegurin hevur verið ein trupulleiki í mong ár, og hann er tað framvegis, serliga tí at ikki slepst undan, at hann partvíst verður lagdur gjøgnum bygt øki og beint gjøgnum komandi vakstrarøki hjáhøvuðsstaðnum, sigur Annika Olsen.
– Persónliga meini eg ikki, at vit kunnu leggja ein innkomuveg gjøgnum túnini hjá fólki ovast í Hoyvíkini og síðan gjøgnum bygt øki allan vegin yvir á Marknagilsvegin.
– Heldur ikki haldi eg tað vera skilagott at vænta, at øll tunga ferðslan fer norðureftir frá tunnilsmunnanum og so upp gjøgnum brekkurnar í ætlaðu loysnini. Tá er nógv lættari hjá teimum at snara til vinstru oman til Havnar og standa í bíðirøð á Hvítanesvegnum, akkurát sum tey altíð hava gjørt.
– Eg havi tí sett fólk at kanna og koma við einum uppskoti um eina tunnilslinju frá Hvítanesi og til Krákugjógv, møguliga Hotel Føroyar. Eitt boð fer helst at fyriliggja longu í komandi viku.
– Tunnilin kemur helst at kosta um 80 túsund meturin. Spurningurin er tí, um henda loysn er stórvegis dýrari enn tann ætlaða við langari vegaføring, brúgvagerð og tunli millum Villingardalsvegin og Hotel Føroyar, tá allir snøklar eru roknaðir við, sigur Annika Olsen.
Málið er tikið upp við landsstýrið og verður nú lagt fyri býráðið til umrøðu og støðutakan. Tekningar og kostnaðarmeting koma helst í næstu viku.
