Tað er Eirikur í Jákupsstovu, løgtingsmaður fyri Tjóðveldi, sum spyr Dennis Holm, landsstýrismann í samferðslumálum í einum grein 52a fyrispurningi.
Hann spyr soleiðis um kongsvitjan og umraðfestingar:
– Hvørjar umraðfestingar í viðlíkahaldi og íløgum verða gjørdar hjá Landsverki, orsakað av kongsvitjanini í summar?
Í viðmerking til spurningin vísir løgtingsmaðurin á, at í eykajáttanarlógini á vári 2024 er biðið um 700.000 krónur afturat til løgmansskrivstovuna í samband við kongsvitjanina.
– Tó er rættiliga vanligt, at ábøtur verða gjørdar á vegir og lendingar, tá kongsvitjan er, sigur Eirikur í Jákupsstovu, sum tí vil hava at vita, hvørjar umraðfestingar til viðlíkahald og íløgur verða gjørdar hjá Landsverki í sambandi við kongsvitjanina.
Danska Kongshúsið hevur boðað frá, at kongshjúnini koma til Føroya á almenna vitjan í summar. Eftir ætlan verður vitjanin í døgunum 11. til 14. juni.
– Hetta er fyrsta vitjanin hjá Fríðriki kongi og Mary drotning í Føroyum, síðani tey tóku við trónuni. Eg gleði meg at bjóða teimum vælkomnum til Føroyar sum kongshjún, segði Aksel V. Johannesen, løgmaður, tá boðini komu um kongsvitjanina.