Beinleiðis lutakast til VFF cup á Rás2

1. februar fara øll 10 effodeildsliðini at kappast í VFF cup. Lutakastið til bólkarnar verður beinleiðis á Rás2

Í fjør skipaði Venjarafelag Føroya, VFF fyri VFF-cup á fyrsta sinni, har fótbóltshugað fólk høvdu møguleikan at síggja tey flestu liðini í effodeildini, umframt okkurt lið í næstbestu deildini. 

 

Hetta varð møguligt, tí kappingin fór fram ein leygardag í Gundadali, har bæði Tórsvøllur, niðari vøllur og ovari vøllur vóru brúktir til kappingina. Í fjør vann HB ta fyrstu, væleydnaðu kappingina.

 

Í verður kappingin leygardagin 1. februar, og á hesum sinni taka øll tey 10 liðini lut, sum skulu manna effodeildina 2014. Talan verður um tveir bólkar við fimm liðum. Talan verður um styttri dystir, har venjararnir fáa høvið at skifta nógv út. 

 

Lutakastið um bólkabýtið verður í beinleiðis sending á Rás2 klokkan 15.10, seinnapartin fríggjadagin. Tá kemur Frankie Jensen frá Venjarafelagnum í Rásarúmið, og har verður so lutakastið, tá báðir bólkarnir til VFF-CUp skulu mannast.

 

Á myndini sæst Frankie Jensen saman við Mattias Davidsen, Áka Johansen og Annfinn Danielsen, sum eisini manna nevndina í VFF.