Danmark bjóðar av í venjingardysti

Føroyska A-landsliðið í fótbólti skal spæla móti Danmark, Andorra og Íslandi

Danska landsliðið fyrireikar seg til EM-endaspælið í summar - Mynd: DBU.dk

Danska landsliðið fyrireikar seg til EM-endaspælið í summar - Mynd: DBU.dk

Fyrsti dysturin hjá nýggja føroyska A-landsliðsvenjaranum, Håkan Ericson, verður á MCH Arena í Herning, har Danmark tekur ímóti fríggjadagin 27. mars. Tríggjar dagar seinni spælir føroyska liðið á útivølli móti Andorra, skrivar heimasíðan hjá Fótbóltssambandinum.

- Eg gleði meg at koma í gongd sum føroyskur landsliðsvenjari, og eg síggi við stórum spenningi fram ímóti hesum báðum dystunum. Sum svenskari er tað altíð nakað serligt at møta Danmark, og tað er ikki minni serligt fyri føroyingar og Føroyar, sigur Håkan Ericson við heimasíðuna hjá FSF og leggur afturat:

##med2##

- Áðrenn dystin móti Danmark, sum skal til EM í summar, hevur føroyski hópurin bara havt møguleika at vant fýra ferðir saman, so tað verður ein stór avbjóðing fyri okkum. Men mær dámar hesar avbjóðingar, og tær kunnu vónandi lyfta okkum.

Møta eisini Íslandi

Sambært landsliðsskránni fyri 2020 skal føroyska A-landsliðið við monnum spæla tíggju dystir í hesum árinum. UEFA Nations League verður spælt í heyst, men áðrenn tað skulu Føroyar spæla fýra venjingardystir – tveir í mars og tveir í juni mánað.

Dystirnir í mars mánað verða á útivølli ímóti Danmark og Andorra. Fríggjadagin 27. mars spæla Danmark og Føroyar á MCH Arena í Herning, og tríggjar dagar seinni, mánadagin 30. mars tekur Andorra ímóti á Estadio Nacional í Andorra.

##med3##

Tíðliga í juni mánað skal føroyska liðið aftur í vøllin í tveimum venjingardystum. Fyrri dysturin verður tann 3. juni, tá Ísland og Føroyar fara at dystast á Laugardalsvøllinum í Reykjavík.

Bíðað verður við at finna mótstøðulið til seinna venjingardystin í juni til lutakastið til UEFA Nations League hevur verið.

Kennir ikki so nógv til Andorra

- Andorra kenni eg ikki so nógv til í løtuni, men tað verður spennandi at møta einum landi, sum er í sama styrkisbólki sum vit. Eg vænti nakrar góðar og læruríkar venjingardystir, sum samstundis skulu tryggja, at vit eru so væl fyrireikaðir sum tilber til avbjóðingarnar í Nations League í heyst, sigur Håkan Ericson.

##med4##

Í komandi UEFA Nations League kappingini eru Føroyar í Deild D saman við Gibraltar, Lettlandi, Liktinstein, Andorra, Malta og San Marino. Hesi sjey londini skulu síðani býtast í tveir bólkar – ein bólk við fýra londum og ein bólk við trimum londum.

Lutakastið til UEFA Nations League verður í Amsterdam í Hollandi týsdagin 3. mars. Dystirnir verða spældir í september, oktober og november.

Danska landsliðið fyrireikar seg til EM-endaspælið í summar - Mynd: DBU.dk

Mynd: (Álvur Haraldsen) Håkan Ericson, nýggjur landsliðsvenjari hjá Føroyum

Mynd: (Álvur haraldsen) René Shaki Joensen í dysti móti Andorra á Tórsvølli í 2017

Mynd: (Bjarni Enghamar) Føroyska liðið, sum byrjaði inni móti Svøríki í novembur 2019