Danskur sigur í Ukraina er bæði góð og ring tíðindi fyri Føroyar

Eftir at danir tóku fremsta plássið í bólkinum í kvøld, er opið stríð um næstfremsta plássið

Rógvi Dal Christiansen, Tórður Guttesen og Eirikur Simonsen fylgja við kappingarneytunum afturvið nátturðanum

Rógvi Dal Christiansen, Tórður Guttesen og Eirikur Simonsen fylgja við kappingarneytunum afturvið nátturðanum

Dysturin Føroyar - Montenegro verður leiktur hósdagin 13. juni klokkan 18.30

Eftir at føroysku landsliðsleikarnir vóru lidnir við venjingina undan dystinum ímóti Montenegro í annaðkvøld, var høvi at síggja hin dystin í bólkinum, sum var ímillum Ukraina og Danmark í Kiev.

Eins og ímóti Føroyum vístu ukrainsku leikararnir, at teir eru sera góðir á heimavølli, men tað var ikki nóg mikið ímóti donsku heimsmeistarunum, ið at enda vunnu 33-30, og harvið tryggjaði sær fremsta plássið í bólkinum, umframt atgongumerkið til EM 2020.

Longu undan dystinum var greitt, at Føroyar kunnu ikki røkka næstfremsta plássinum, ið eisini hevur eitt pláss í EM-endaspælinum við sær. Kortini er ein tepur møguleiki. Les meira um tað á in.fo seinni.

 

 

 

Montenegro skal vinna á Føroyum

Montenegriski hópurin man hava fylgt væl við dystinum í Kiev, tí úrslitið merkir, at Montenegro við sigri á Føroyum í annaðkvøld og á Ukraina sunnudagin, spælir seg til endaspælið.

Tí er eingin ivi um, at Montenegro fær eina eyka orsøk at spíla seg út á fyribils føroyska heimavøllinum, Farum Arena, í annaðkvøld. Og hetta kemur afturat hevndarhugin, ið montenegrisku leikararnir longu frammanundan hava, eftir at tað eydnaðist Føroyum at vinna sær eitt stig í Montegro í heyst.

 

Munnu danir taka sær av løttum?

Hetta merkir kortini eisini, at danir ikki noyðast at spíla seg so nógv út, tá ið teir eiga heimavøll ímóti Føroyum sunnudagin í Aalborg. Eitt nú hevur danski landsliðsvenjarin gjørt greitt, at hann ætlar ikki at seta heimsins besta leikara 2019, Mikkel Hansen, á vøllin, um tað skuldi eydnast at tryggja fremsta plássið í kvøld. Nógvir av donsku leikarunum spæla í týsku bundesliguni og í fremstu donsku deildini, ið báðar endaðu um vikuskiftið. Harafturat spældi væntaði avloysarin fyri Mikkel Hansen, Lasse Anderson, bæði hálvfinalu og bronsudyst í Champions League farna vikuskiftið. Tí er sannlíkt, at danski venjarin vil seta sum minst í váða sunnudagin, tí flestu av donsku leikarunum hava spælt eitt hart, langt og krevjandi kappingarár, áðrenn teir kunnu fara í summarfrí eftir dystin ímóti Føroyum.

Rógvi Dal Christiansen, Tórður Guttesen og Eirikur Simonsen fylgja við kappingarneytunum afturvið nátturðanum