NSÍ fær rimmar styrk

Ein núverandi- og ein fyrrverandi landsliðsleikari hava skrivað undir sáttmálar við NSÍ.

NSÍ, sum er á 5. plássi í Effodeildini, er farið undir fyrireikingarnar til seinnu hálvu – eisini hvat leikaratilfeingi viðvíkur. Eyðstein Skipanes, ítróttarstjóri í NSÍ, váttar í kvøld fyri in.fo, at avtalur eru gjørdar við tveir nýggjar leikarar.


Talan er um 25 ára gamla landsliðsleikaran, Pól Jóhannus Justinussen, og 34 ára gamla fyrrverandi landsliðsleikaran, Christian Høgna Jacobsen. Pól Jóhannus vendir heimaftur til barndómsfelagið eftir eitt hálvt ár í EB/Streymi, meðan Christian Høgni, sum er leikandi venjari hjá ÍF Føroyum í Keypmannahavn, er heima í lestrarørindum.


- Vit hava havt nógvar skaðar og fleiri eru hálvir, serliga í verjupartinum, so hetta kom væl við. Christian Høgni spælir við í seinnu hálvu, meðan Pól Jóhannus hevur skrivað undir til og við 2015, sigur Eyðstein Skipanes.


Pól Jóhannus hevur spælt við í 17 dystum hjá EB/Streymi í ár, har hann fyri tað mesta hevur spælt á miðvøllinum. Hann kann tó eisini spæla í verjuni. Christian Høgni er fjøltáttaður spælari og kann røkja flest øll tey framrættaðu plássini. Hóast hann hevur havt lesnaðin í fremstu røð seinnu tíðina, so er ítróttarstjórin bjartskygdur.


- Christian Høgni sær út til at vera væl fyri, og nú hann er heima í lestrarørindum, ynskti hann at spæla við okkum. Hann hevur altíð verið góður fyri NSÍ, og vit vóna sjálvandi, at hann verður tað aftur hesaferð, sigur Eyðstein Skipanes at enda.