HB er í nýggjari útgávu

Í nýggjum búnum og við nógvum nýggjum fólki er HB á odda við Løkin

Lagið er gott í HB leguni, nú teir rinda møðina og leggja ætlanir fyri, hvussu teir skulu skipa seg í øðrum hálvleiki við Løkin í Runavík, har HB er frammanfyri 1-0. Einasta málið í fyrra hálvleiki skoraði Ári Mohr Olsen, sum í vetrarsteðginum flutti úr B71 og til HB.

 

Merkisvert er tað, at HB spælararnir eru í spildurnýggjum útivallarbúnum. HB litirnir hava altíð verið tann reyði og svarti, og á útivølli plagdi tað ofta at vera í hvítum, at HB spældi.

 

Sum tað sæst á myndini, so eru Tróndur Jensen og Jóhan Troest Davidsen, sum nú er liðformaður, og hinir HB spælararnir í stríputum troyggjum – hvítar og ljóst bláar strípur.

NSÍ spælararnir eru í eyðkendu búnunum – gulir og svartir. Men tað gongur ikki væl at framala eyðkenda álopsspælið, sum serliga Árni Frederiksberg og Klæmint A. Olsen plaga at vera ímyndirnar av.

Nú fæst at síggja, hvussu tað fer at ganga í øðrum hálvleiki.