H71 vann á oddaliðnum í róligum dyst

H71 koppaði Natasju, Báru og Kyndli at enda

Maria Halsdóttir Weyhe og H71 koppaðu Kyndli at enda

Maria Halsdóttir Weyhe og H71 koppaðu Kyndli at enda

Oddaliðið, Kyndil, tók í dag ímóti nýkosnu steypavinnaranum, H71, ið áðrenn dystin lá á fjórða plássi í SMS-deildini.

Og tað var H71, sum, basti oddaliðnum 24-22 eftir ein róligan dyst, har tað merktist á spenninginum, at liðini bæði longu hava tryggjað sær hálvfinalupláss.

Enn meira merktist á dystinum, at Kyndilsliðið var sera skert. Bert tríggjar útileikarar og ein málverja hevði oddaliðið á bonkinum, har saknurin serliga mundi vera í Súnu Krossteig Hansen, sum framvegis stríðist við skaða.

Og tí gjørdist ongin ovfarin av, at H71 byrjaði dystin best.

H71 var tíðliga í dystinum á odda við fýra málum, men við einari góðari 5-1-verju, fekk Kyndil steðga H71-álopinum. Lyklin mundi vera Bjørt Krossteig, sum vardi høgt á vøllinum, og trýsti H71-álopið til mistøk.

Í hinum endanum fingu Bára Krossteig Hansen og Natasja Hammer víst seg fram við góðum skotum, og so vendi Kyndil dystinum og var á odda í hálvleikinum. Tá høvdu tær báðar, Bára og Natasja skorað ávikavist seks og fimm mál av teimum 13 Kyndils-málunum. H71 hevði 11.

Dystarmyndin var hin sama í seinna hálvleiki, har Kyndil hevði hug at økja upp í trý og fýra mál á muni. Men frá støðuni 22-19 tá ið einir seks minuttir restaðu í, koppaði aftur. Tað eydnaðist H71 at fáa stórskjúttarnar hjá Kyndli eitt sindur burtur frá skotstøðunum, og Kyndil fekk ikki fleiri mál í dag. Vár H. Thomsen kom inn í H71-málið og forðaði fyri teimum møguleikum, ið komu, og í hinum endanum eydnaðist tað serliga Mariu Halsdóttir Weyhe, at finna loysnir í álopinum. Ein minutt fyri leiklok, legði hon eisini H71 á odda 23-22, og Kyndil misnýtti stutt eftir ein møguleika at javna. H71 fekk bóltin aftur, spældi næstan alla tíðina út eftir eitt time-out, og so kundi Lív B. Zachariassen seta seinasta bóltin í netið til 24-22 júst sum klokkan ljóðaði.

Vónbrotið hjá Kyndli og gleðin hjá H71 var kortini so sum so, og Bára Krossteig Hansen hjá Kyndli og Durita Toftum Joensen hjá H71 ásannaðu eisini í samrøðu við FM1, at hugurin fyrst og fremst liggur á hálvfinalunum, ið eru fyri framman.

Hoyr dystarenda og samrøður á FM1 við at trýsta HER.

Kyndil – H71 22-24

Kyndil: Bára Krossteig Hansen 9, Natasja Hammer 9, Karin Midjord 2, Anja Eliasen 1, Emma Hansdóttir 1

H71: Maria H. Weyhe, Lív B. Zachariassen 5, Marita Mortensen 5, Guðrið á Borg 4, Durita Toftum Joensen 1, Vár B. Zachariassen 1, Christina Arge 1

##ms##

Maria Halsdóttir Weyhe og H71 koppaðu Kyndli at enda