ÍSF: Javnstøða í føroyskum ítrótti

Árligi aðalfundurin hjá ÍSF var í ÍSF-húsinum sunnudagin

Árligi aðalfundurin hjá ÍSF var í ÍSF-húsinum sunnudagin. Ítróttarsamband Føroyar hevur sett út í kortini, at tað skal verða javnstøða í føroyskum ítrótti. Í tíðindaskrivi í dag hevur ÍSF bjóðað øllum politisku flokkunum til eitt ítróttartiltak, har sambondunum ynskja at greiða frá ómetaliga stóra virðinum av ítróttinum.

Eingin starvsnevndarlimur stóð fyri vali, og heldur nevndin tískil fram óbroytt. Nevndin í ÍSF er Elin Heðinsdóttir Joensen, forseti, Jon Hestoy, varaforseti, Schandorff Vang, John Kjær og Sigurð Rasmussen, nevndarlimir. 

-       Í síni frágreiðing kom Elin Heðinsdóttir Joensen, forseti í ÍSF inn á týdningin, sum ítrótturin hevur fyri tann einstaka, men eisini fyri samfelagið sum heild. Elin Heðinsdóttir Joensen segði:

”samfelagsvirðið sum ítróttarfeløg og sjálvboðin dagliga skapa er ovurhonds stórt. Tískil er okkara uppgáva at greiða politisku skipanini frá hesum, tí vit hava ein varhuga av, at politiska skipanin neyvan er nóg tilvitað um hetta.”

- Í hesum sambandi fer ÍSF at bjóða øllum politisku flokkunum til eitt Ítróttating, har vit saman við sambondunum ynskja at greiða frá ómetaliga stóra virðinum av ítróttinum, skivar ÍSF í tíðindaskrivinum.

 

Javnstøða í føroyskum ítrótti

ÍSF hevur ynski um, at javnstøða millum kynini skal valda í mest møguligan mun. Í hesum sambandi tók aðalfundurin undir við uppskotinum frá Starvsnevndini um javnstøðu í føroyskum ítrótti.

ÍSF hevur sett sær sum mál, at í 2025 skal býtið millum kynini í einstøku nevndunum í minsta lagi verða 70/30, meðan tað í 2030 í minsta lagi skal verða 60/40. Fyri at arbeiða móti málinum um størri javnstøðu, hevur ÍSF gjørt kanning har hugt verður eftir hvussu kynsbýtið í føroyskum ítrótti er í dag. Ætlanin er, at hendan kanning skal verða afturvendandi árliga.