Nú er Filip føroyingur

Toppskjúttin í føroyskum hondbólti seinastu níggju árini hevur fingið ríkisborgararætt

Savnsmynd. Filip Jojic eftir eitt av sínum óteljandi málum fyri VÍF. Nú kann hann kanska skjóta mál fyri Føroyar

Savnsmynd. Filip Jojic eftir eitt av sínum óteljandi málum fyri VÍF. Nú kann hann kanska skjóta mál fyri Føroyar

Filip Jojic hevur øll níggju árini í Føroyum verið ovast á toppskjúttalistanum í manshondbolti, og nú kann hann eisini skjóta mál á føroyska landsliðnum. Tí í dag hevur Filip fingið váttanina um, at hann hevur fingið føroyskan ríkisborgararætt.

Úr savninum: Filip vónar at kunna spæla fyri Føroyar skjótt

- Tað tók sína tíð, men tað var tað vert, sigur ein fegin Filip Jojic við in.fo.

Umsøknin hevur verið undir drúgvari viðgerð, og vónin á landsliðnum hevur verið, at málkongurin í Føroyum seinasta áratíggju kundi stilla upp til landsdyst sum skjótast. Tí hevur hann eisini verið við til fleiri av seinastu landsliðsvenjingunum í Føroyum.

Fekk boðini á veg til landsliðsvenjing

Landsliðið hevur verið savnað til venjingar seinastu tríggjar dagarnar, og Filip greiðir frá, at hann var á veg til venjing í morgun, tá ið hann fekk boðini.

- Eg fór heimanifrá, og so ringdi konan og segði at brævið lá í postkassanum, sigur Filip Jojic, ið er giftur við føroyska landsliðsleikaranum, Duritu Christophersen Jojic.

Vil stríðast á vøllinum heldur enn við myndugleikar

Nú kunnu føroyskir hondbóltsfjepparar so spentir fylgja við um Filip Jojic kann gera um seg á landsliðnum.

Filip Jojic sjálvur leggur dent á, at nú skal stríðast fyri at fáa pláss á liðnum.

- Eg gleði meg at stríðast um plássið heldur enn við myndugleikarnar, tekur hann til.

31 ára gamli Filip Jojic kom til Føroya og Team Klaksvík í 2011. Árið eftir fór hann til VÍF, har hann hevur spælt líka síðani. Øll árini hevur hann verið toppskjútti við ársenda, og var eisini ovast á listanum við 154 málum, tá ið hetta kappingarárið brátt steðgaði.

Savnsmynd. Filip Jojic eftir eitt av sínum óteljandi málum fyri VÍF. Nú kann hann kanska skjóta mál fyri Føroyar