Nýggjur málskjútti við Løkina

NSÍ skoraði øll trý málini fyrsta stóra hálva tíman

Tann síðsti av fýra venjingardystum í dag var við Løkina í Runavík, har NSÍ hevði vitjan av AB.

Heimaliðið var væl meiri á bóltinum enn gestirnir, og NSÍ vann 3-0. Øll málini vórðu skorað fyrsta stóra hálva tíman.

Klæmint A. Olsen plagar at skjóta nógv flest mál fyri NSÍ, men hann var ikki á listanum ídag.

Fyrsta málið í dag skoraði Martin Klein Joensen, tá ið tíggju minuttir vóru farnir. 20 ára gamli álopsspælarin, sum er uppvaksin í Sarpugerði, hevur ongan landskappingardyst spælt í bestu deildini.

Petur Knudsen økti til 2-0 í 21. minutti, og miðverjin Oddur Højgaard staðfesti 3-0 sigurin, tá ið tað restaðu tíggju minuttir av fyrra hálvleiki.

Hjá AB vardi Bjarti Mørk málið í fyrra hálvleiki, og í seinna hálvleiki avloysti Silas Eyðsteinsson millum AB stólparnar.