Páll Fangi tók meistaran

6-mannafør menn: Tvørabáturin misti ólavsøkusigurin á stokkinum

Tvørabáturin tryggjaði sær í dag FM heitið í kappingini millum 6-mannafør við monnum.

Tað lá til, at tvøramenn skuldu vinna FM heitið, og teir vunnu FM við at enda næstfremst í dag.

Sjálvandi eru teir á Tvøroyri ovurfegnir yvir FM sigurin, men tað er einki at undrast á, um teir eru vónsviknir yvir, at tað ikki eydnaðist teimum at vinna á ólavsøku.

Tvørabáturin var fremstur mesta partin av teininum, og eina løtu var hann tað mesta av einari hálvari bátslongd frammanfyri næsta kappingarneytan.

Næsti kappingarneytin var alla tíðina Páll Fangi úr Klaksvík. Tá ið tað restaðu hálvtannað hundrað metrar, fór Páll Fangi rættiliga at røra upp á seg. Fjarstøðan fram til Tvørabátin minkaði støðugt, og á málinum var Páll Fangi eitt vet undan meistarunum.

Páll Fangi vann eisini á norðoyastevnu, og við sigrinum í dag vann hann trygt silvurkrónurnar í FM kappingini. Tvørabáturin er meistari, og harvið hevur Tvøroyri vunnið tvær FM kappingar í ár.

 

6 mannafør menn

1

Páll Fangi

04:38.09

 

 

2

Tvørabáturin

04:38.19

 

 

3

Smyril

04:41.12

 

 

4

Jarnbardur

04:43.07

 

 

5

Rádni

04:44.04

 

 

6

Lómur

04:45.08

 

 

7

Herningur

04:47.12

 

 

8

Hvessingur

05:01.22

 

 

9

Gongurólvur

05:01.23