U21: HB omaná í drúgvari finalu

Klokkan var útvið 23 áðrenn HB kundi lata seg krýna sum steypavinnari eftir finalusigur ímóti Skála.

Mynd: Skermmynd / KVF

Mynd: Skermmynd / KVF

Tað var ein lívlig finala bæði á og uttanfyri vøllin, tá ið HB og Skála í kvøld dystaðust í U21-steypafinaluni hjá monnum á Tórsvølli.

Gilli Róason legði HB á odda 1-0 tá ið lítil hálvur tími var spældur, og tað líktist eisini leingi einum teprum HB-sigri.

Í seinna hálvleiki søkti Skála at, og smáar tíggju minuttir fyri leiklok eydnaðist tað Aksel B. Danielsen at javna til 1-1 við einum stútara.

Eftir 1-1-javnleik í vanligu leiktíðini var neyðugt við longdari leiktíð, og her gjørdi HB skjótt av og legði seg á odda 2-1 við enn einum máli frá Gilla Róasyni.

Tað var tó ikki bara sum at siga tað hjá HB at rista Skála av sær, tí nakað inn í seinna hálvleik av longdu leiktíðini var Karl Martin Johansen á blettinum eftir hornasparksinnlegg og javnaði til 2-2 fyri Skála.

Villiam Emil Klein hjá HB var um reppið at gerast sigursharri á allarsíðsta minutti, men hann rakti á stongina, og við 2-2-javnleiki var neyðugt við brotssparkskapping.

Í brotssparkskappingini var HB omaná, væl hjálpt av tveimum bjargingum frá Mattias Lamhauge í málinum. Skála misnýtti í alt trý brotsspørk. HB vann tilsamans 5-3 og kann nú kalla seg steypavinnara í U21-deildini 2019.

Dagsins leikari: Aksel B. Danielsen (Skála)


HB - Skála 1-1 (1-0) - eftir longda leiktíð: 2-2. Eftir brotssparkskapping: 5-3.

1-0: Gilli Róason, 28.

1-1: Aksel B. Danielsen, 81.

2-1: Gilli Róason, 92.

2-2: Karl Martin Johansen, 111.


Brotsspørk:

2-3: Aksel B. Danielsen (Skála) skorar

3-3: Jógvan Petersen (HB) skorar

3-3: Djóni Petersen (Skála) misnýtir, Mattias Lamhauge (HB) bjargar

4-3: Símun Sólheim (HB) skorar

4-3: Andreas E. Jacobsen (Skála) misnýtir, Mattias Lamhauge (HB) bjargar

4-3: Gilli Róason (HB) misnýtir, Martin Danielsen (Skála) bjargar

4-3: Rói Olsen (Skála) misnýtir, rakar uppum

5-3: Tormóður P. Djurhuus (HB) skorar

Mynd: Skermmynd / KVF