Uros skoraði og misnýtti brotsspark

Tað var stevnuundirhald av fínum slag, tá ið AB enn einaferð spældi javnt í ólavsøkudysti

Mynd: (Bjarni Enghamar) Uros Stojanov hevur skorað til 1-0

Mynd: (Bjarni Enghamar) Uros Stojanov hevur skorað til 1-0

Siðvenja er, at AB eigur heimavøll 27. juli. Soleiðis var tað eisini í kvøld, og úrslitið var, sum tað so ofta hevur verið. Tølini siga, at tað endar ofta javnt, og soleiðis var tað eisini í kvøld.

ÍF var tvær ferðir frammanfyri, og AB svaraði tvær ferðir aftur, og harvið var úrslitið 2-2.

ÍF hevði risa møguleika at skora sigursmálið, tá ið tað restaðu átta minuttir. ÍF vann brotsspark, og Uros Stojanov tók sær av royndini úr ellivu metrum. Men Bjarki V. Mørk tveitti seg til vinstru fyri seg sjálvan og bjargaði.

Gundur E. Petersen, sum í kvøld fekk møguleikan á sentrala miðvøllinum, tí Hákun Edmundsson var í miðverjuni fyri leikbannaða Jens Joensen, átti uppleggið, tá ið Uros Stojanov setti hol á.

Í yvirtíðini av fyrra hálvleiki javnaði AB. Jákup Nolsøe Olsen hálvbjargaði, og Bjarki C. Nielsen var fyrstur á returbóltinum og skoraði.

Gundur E. Petersen legði ÍF á odda 2-1. Uros Stojanov takkaði fyri seinast og legði upp til málið.

Tá ið AB javnaði til 2-2 var talan um fínt uppspæl. Asbjørn Heðinsson á vongverjanum í vinstru var sentralur í uppspælinum, og Tóki á Lofti skoraði.

AB eigur framvegis fyrsta sigurin til góða, og fuglfirðingar iðra seg sjálvandi um, at toppskjúttin Uros Stojanov, sum í kvøld skoraði sítt 11. mál, misnýtti brotssparkið og harvið møguleikan enn einaferð at leggja ÍF á sigurskós.

 ##ms##

AB – ÍF 2-2 (1-1)

0-1: Uros Stojanov 33.

1-1: Bjarki C. Nielsen 45.

1-2: Gundur E. Petersen 49.

2-2: Tóki á Lofti 57.

Dómari: Jóhan Hendrik Ellefsen

AB: Bjarki Vitalis Mørk – Dánjal Reginsson (Ári Arge, 84.), Gert Drangastein, Sørin Samuelsen, Asbjørn Heðinsson – Tóki á Lofti (Janus Svabo Samuelsen, 78.), Rógvi Poulsen, Eli Christiansson, Jasper Van Der Heiyden – Adeshina Lawal (Bartal S. Petersen, 73.), Bjarki C. Nielsen

Gult kort: Bjarki C. Nielsen, Tóki á Lofti, Eli Christiansson

Venjarar: Tommy Brimsvík og Símun Samuelsen

ÍF: Jákup Nolsøe Olsen – Sjúrður Pauli Nielsen, Hákun Edmundsson, Jan Ó. Ellingsgard, Andy Ó. Olsen – Hans Jákup Lervig, Karl Løkin, Gundur E. Petersen, Dánjal á Lakjuni (Ari Ó. Ellingsgaard, 69.) – Filip Djordjevic, Uros Stojanov

Gult kort: Karl Løkin, Gundur E. Petersen, Sjúrður Pauli Nielsen

Venjarar: Hans Jørgen Djurhuus, Ólavur Larsen

Mynd: (Bjarni Enghamar) Uros Stojanov hevur skorað til 1-0